गोपाल जिटी
वालिङ, १० असोज–स्याङ्जाको भीरकोट नगरपालिका ६ मा रहेको भाग्योदय माध्यमिक विद्यालय नगरपालिकाकै मध्येभागमा रहेको शैक्षिक संस्था हो । यो विद्यालय देशमा तीनतहको सरकार सञ्चालन भएसँगै पूर्वाधार विकास तथा गुणस्तरीय शिक्षामा अगाडि बढेको शैक्षिक संस्थामा पर्दछ । यसरी सुविधा सम्पन्न भौतिक संरचनासहित गुणस्तरीय शैक्षिक अभ्यासमा अगाडि बढेका जिल्लाका शैक्षिक संस्थामध्ये भाग्योदय मावि पनि एक हो । भीरकोट नगरपालिकाकै मध्येभागमा रहेको विद्यालयले नमूना विद्यालयकारुपमा विकास गर्नका लागि केही असल अभ्यासहरुसमेत प्रयोगमा ल्याइसकेको छ । विक्रम सम्वत २०३३ सालमा स्थापना भएको विद्यालयले यो वर्ष स्वर्ण महोत्सव मनाउने भएको छ । भीरकोट ६ को उजेलीडाँडाको मनोरम वातावरणमा रहेको विद्यालयले आउँदो माघ महिनामा स्वर्ण महोत्सव मनाउने भएको हो ।
आउँदो माघ महिनामा विशेष कार्यक्रमकासहित आफ्नो स्वर्ण महोत्सव मनाउने तय गरेको विद्यालय व्यवस्थापन समितिका अध्यक्ष छायाराम खनालले जानकारी गराउनुभएको हो । आफ्नो संयोजकत्वमा मूल आयोजक समिति बनाएर स्वर्ण महोत्सवको तयारीमा लागिएको अध्यक्ष खनालको भनाई छ । स्वर्ण महोत्सव ३ दिनको हुने छ । महोत्सवका अवसरमा विद्यालय प्राङ्गणमा स्मारक बनाइने र स्मारिका प्रकाशन गर्ने कार्यक्रम रहेको उहाँले उल्लेख गर्नुभयो । यसले विद्यालयको ऐतिहासिक दस्तावेजिकरण गर्ने उहाँले व्यक्त गर्नुभयो । यसैगरी पठनपाठनमा विषयहरु थप गर्ने र क्याम्पस सञ्चालनका लागिसमेत छलफलहरु भैरहेको अध्यक्ष खनालले बताउनुभयो । अहिले व्यवहारिक शिक्षा अन्तर्गत व्यवसायिक कृषि छ, योसँगै समयको माग र आवश्यकतालाई मध्येनजर गरेर अन्य विषय थप गर्ने सन्दर्भमा छलफल भैरहेकोसमेत उहाँको भनाई छ ।
भीरकोट नगरपालिकाका निवर्तमान नगरप्रमखसमेत रहनुभएका अध्यक्ष खनालका अनुसार आफ्नो संयोजकत्वमा ५ सय १ सदस्यीय स्वर्ण महोत्सव मूल आयोजक समिति बनाएर तयारीमा लागिएको छ ।
शिक्षकहरु, पूर्व शिक्षक तथा विद्यार्थीहरु, पूर्व व्यवस्थापन समितिहरु एवम् अभिभावकलगायत यससँग जोडिएकाहरुको सहभागितामा ५ सय १ सदस्यीय स्वर्ण महोत्सव मूल आयोजक समिति बनाएर तयारीमा लागिएको हो । यस अन्तर्गत पूर्व विद्यार्थी डा. तुलसी प्रभासको संयोजकत्वमा स्मारिका तयारीका लागि ७ सदस्यीय उपसमिति बनिसकेको छ, जसले आफ्नो कार्य प्रारम्भ गरिसकेको छ । यसैगरी दशै सकिए लगतै अरु विभिन्न उपसमितिहरु बनाएर कार्य विभाजन गरिनेछ ।
यसैगरी विद्यालयका प्रधानाध्यापक रेशमलाल खनालले भीरकोट नगरपालिकाकै प्रतिष्ठित शैक्षिक संस्थाको स्वर्ण महोत्सवलाई हामी सबैको साझा पर्वकारुपमा मनाउनेगरी तयारीमा लागिएको बताउनुभयो । यो क्षेत्रकै अग्रणी संस्थाको महोत्सवलाई सभ्य भव्य र मर्यादित बनाउन शिक्षक, अभिभावक, विद्यार्थी तथा समाजसेवी सम्पूर्ण महानुभावहरुलाई आ–आफ्नो ठाउँबाट सहयोगी भूमिका निभाउन उहाँको आग्रह छ ।
असल अभ्यास तथा गुणस्तरीय शिक्षाका प्रयासः
विद्यालय व्यवस्थापन समितिका अध्यक्ष खनालका अनुसार नमूना विद्यालयकारुपमा विकास गर्नका लागि केही असल अभ्यासको थालनी गरिएको छ । खाजा व्यवस्थापनलाई पहिलो असल अभ्यासकारुपमा लिइएको छ । यसका लागि अभिभावकको सहभागिता गराइएको छ । जसमा प्रत्येक दिन ३ जना अभिभावकको उपस्थितिमा खाजाको व्यवस्था गरिदै आइएको छ र त्यसको हिसाव पनि उनीहरुले नै राख्दछन् । विद्यार्थीसँगै शिक्षकहरुले पनि खाजा खाने र ६ दिनमा ६ प्रकारका खाजाको व्यवस्था गरिएको छ । यसका लागि राज्यका तर्फबाट प्राप्त रु.१५ ले खर्च नपुग हुने भएकाले अभिभावहरुले मासिक २ सय रुपैयाँ थप्ने गरेका छन् ।
यसैगरी दोस्रोमा कृषि अथवा वागवानी अन्तर्गत नमूना बगैंचाको थालनी गरिएको छ । जसमा छतमा फलफूल बगैंचा बनाउने र बारीमा पनि तरकारीहरु लगाउने काम गरिएको छ । जसले गर्दा पढ्दै कमाउदै गर्न सकियोस भनेर पनि सुरुवात गरिएको हो । यस्तै तेस्रोमा विद्यार्थीहरुलाई वर्गिकरण गरेर उनीहरुको क्षमताका आधारमा अतिरिक्त कक्षाको व्यवस्थापनसहित पठनपाठन अगाडि बढाइएको छ । शिक्षकहरुलार्इृ भ्रमण गराउने र शैक्षिक उन्नतिका क्षेत्रमा विज्ञहरुसँग तालिममा सरिक गराउने भैरहेको छ ।
शुद्ध पिउने पानीको व्यवस्था, प्राथमिक स्वास्थ्य सेवाको प्रवन्ध र दुईवटा गाडीको व्यवस्था गरी विद्यार्थीलाई यातायात सुविधा प्रदान गरिएको छ ।