भीरकोट,१७ पुस–भीरकोट नगरपालिकामा शैक्षिक गुणस्तरलाई प्राथमिकतामा राखेर विविध कार्यक्रमहरु गरिएको छ । बालमैत्री नगर घोषणा गरिएको भीरकोटमा शैक्षिक सुधारका लागि विभिन्न प्रयासहरू गरिएको नगरपालिकाले जनाएको छ ।
वडाहरुले आफ्‌नो वडा भीत्र रहेका विद्यालयमा कसरि शैक्षिक गुणस्तर बृद्धि गर्न सकिन्छ भनेर सोही अनुसार कार्यहरु भइरहेकाछन् । वडा नम्बर ८ को कार्यालयले वडाभरका विद्यालयहरूको शैक्षिक गुणस्तर सुधारलाई प्राथमिकता राखेर काम गरिरहेको वडा अध्यक्ष नन्दलाल खनालले जानकारी दिनुभयो । यो आर्थिक वर्षमा शैक्षिक गुणस्तर सुधारका कार्यक्रम सञ्चालन गर्न करिब ७ लाख रुपैयाँ बजेट विनियोजन गरेको छ ।
वडा कार्यालले सिरूखर्क जोगिस्थान मावि, भाग्योदय मावि र आधारभूत विद्यालयका विद्यार्थीहरूलाई जाडोमा विद्यालय जाने वातावरण सहज बनाउन पोशाक वितरण गरेको छ । सिरूखार्क जोगिस्थान माधमिक विद्यालयका ७० जना विद्यार्थीलाई ट्रयाक सुट, टिसर्ट र जुत्ता वितरण गरिएको विद्यालयका प्रधानाध्यापक तोलाकान्त चापागाईले जानकारी दिनुभयो । भाग्योदय माविमा अध्ययनरत १ सय ८० जना विद्यार्थीलाई विद्यालय पोशाक वितरण गरिएको शिक्षक भोजबहादुर थापाले जानकारी दिनुभयो । यसै गरी आधारभूत विद्यालयमा अध्ययनरत करिव ९० जना विद्यार्थीलाई पनि विद्यालय पोशाक वितरण गरिने अध्यक्ष खनालको भनाइ रहेकोे छ ।
भाग्योदय माध्यमिक विद्यालय ६ नम्बर वडामा पर्ने भएपनि वडा नम्बर ८ का अधिकांश विद्यार्थी यहाँ अध्ययनरत भएकाले वडाका विद्यार्थीलाई लक्षित गरी पोशाक वितरण गरिएको अध्यक्ष खनालले बताउनुभयो । सबै लक्षित विद्यार्थीहरूलाई पोशाक वितरणका लागि ३ लाख रुपैयाँ बजेट छुट्याइएको वडा कार्यालयले जनाएको छ ।
आधारभूत र एसईई तहको शैक्षिक नतिजा कमजोर भएकाले नतिजा सुधार गर्न पव्लिक एकेडेमी माविमा ४ लाख रुपैयाँको लागतमा अतिरिक्त कक्षा सञ्चालन गरिँदैछ । यसैगरी, एसईई र आधारभूत तहका कमजोर नतिजा भएका विद्यालयहरूमा पनि अतिरिक्त कक्षाको व्यवस्था गरिने अध्यक्ष खनालले बताउनुभयो । शैक्षिक सुधारका यी पहलले विद्यार्थीहरूको शैक्षिक स्तर उकास्न सहयोग पुग्ने विश्वास वडा कार्यालयको रहेको छ ।