विरुवा,१४ असार– विरुवा गाउँपालिका गण्डकी प्रदेशमै पहिलो बालश्रम मुक्त गाउँपालिका घोषणा भएको छ । आज शुक्रबार गाउँपालिका अध्यक्ष सूर्य बहादुर कुँवरले एक कार्यक्रमका बिच गाउँपालिकालाई बालश्रम मुक्त पालिका घोषणा गर्नुभाएको हो ।
कार्यक्रममा गाउँपालिका अध्यक्ष कुँवरले गण्डकी प्रदेशमै विरुवालाई पहिलो बालश्रम मुक्त गाउँपालिका घोषणा गर्न सफल भएको बताउनुभयो ।
अध्यक्ष कुँवरले भन्नुभयो, “विद्यालय जानबाट बञ्चित छन् कि छैनन्, बाल अधिकार विपरित कार्यमा लगाइएका बालबालिका छन् कि छैनन् अध्ययन अनुगमन गरेका छौं । यसरी कानून विपरित बालश्रममा लगाइएका छन् कि छैनन् भन्ने बुझेर मात्र बालश्रम मुक्त गाउँपालिका घोषणा कार्यक्रम गरिएको हो ।”
अध्यक्ष कुँवरले घोषणासँगै व्यवहारमै बालश्रम मुक्त बनाउन सबैको साथ र सहयोग रहने अध्यक्ष कुँवरको विश्वास रहेको छ ।

विरुवाका ८ वटै वडाले बालबालिकालाई श्रममा लगाउँदैनौं भनेर प्रतिवद्धता जनाएपछि बालश्रम मुक्त विरुवा गाउँपालिका घोषणा कार्यक्रम आयोजना गरिएको उहाँले बताउनुभयो । गण्डकी प्रदेशमा विरुवा गाउँपालिका पहिलो बालश्रम मुक्त घोषणा गरिनु ऐतिहासिक कार्य भएको अध्यक्ष कुँवरको भनाइ छ ।  
गुड सेफर्ड इन्टरनेशनल फाउण्डेशन नेपालकी प्रमुख कस्कीला निकोलसले नेपालमा ११ लाख बालबालिका अहिले पनि बालश्रमीका रुपमा काम गरिरहेको बताउनुभयो । विरुवा गाउँपालिकाले महत्वपूर्ण कार्य गरेको र यो कार्यको निरन्तरताको लागि संस्थाले सक्दो सहयोग गर्ने बताउनुभयो ।
राष्ट्रिय बाल अधिकार परिषदका गण्डकी प्रदेश समन्वय अधिकृत बद्रिप्रसाद वाग्लेले १४ वर्षसम्मका बालबालिकालाई बालश्रममा लगाउनु कानून विरुद्ध हुने बताउनुभयो । बालबालिकालाई काममा नै लगाउनु हुदैन भन्ने होइन, काममा लगाउन र सिकाउदै जानुपर्छ । श्रमिककारुपमा र जोखिमयुक्त कार्यमा बालबालिकालाई बालश्रममा लगाउन हुदैन भनिएको उहाँले स्पष्ट पार्नुभयो ।

कार्यक्रममा गाउँपालिकाका जनप्रतिनिधि,शिक्षक एवम् सामाजिक क्षेत्रमा क्रियाशील विभिन्न व्यक्तित्वहरुद्वारा बालश्रम मुक्त बिरुवा गाउँपालिका घोषणा कार्यान्वयनमा लाग्ने प्रतिवद्धता व्यक्त गरेका छन् ।
बालश्रम नगरौं, नगराऔं, बालश्रम कानून विरुद्धको कार्य हो । बालश्रम दण्डनीय अपराध हो । लगायत लेखिएका प्लेकार्डसहितको गाउँपालिकाको कार्यपालिकाबाट निकालिएको ¥याली विरुवा बजार परिक्रमा गरी बालश्रम मुक्त घोषणा कार्यक्रमको औपचारिक सभामा परिणत भएको थियो ।
महिला बालबालिका तथा जेष्ठ नागरिक मन्त्रालय राष्ट्रिय बाल अधिकार परिषद ललितपुर एवम् गुड सेफर्ड इन्टरनेशनल फाउण्डेशन नेपालको समन्वय तथा सहकार्य र गाउँपालिकाको आयोजनामा बालश्रम मुक्त विरुवा गाउँपालिका घोषणा गरिएको हो ।