वालिङ,२७ जेठ- वालिङ नगरपालिका वडा नम्बर १० ढकालडाँडामा शनिबार राति बाख्रा फर्ममा आगलागी भएको छ ।
स्थानीय रुक्मानन्द ढकालले ब्यवसायिकरुपमा सञ्चालन गर्दै आउनुभएको ‘ग्रहौंकालिका ब्यवसायिक बाख्रा फर्म’ मा आगलागी हुँदा खोरसहितको भौतिक संरचना, दाना तथा ११ वटा बाख्रा जलेका छन् ।

आगलागीबाट के कति क्षति भयो भन्ने विवरण आएको छैन । भौतिक संरचना लगायत बाख्रा जलेर नष्ट हुँदा करिब ४० लाखको क्षति भएको अनुमान गरिएको छ । आगलागीको कसरी भएको भन्ने आँफूलाई थाहै नभएको ढकालले बताउनुभएको छ । फर्ममा विद्युत शर्ट भई आगलागी भएको हुनसक्ने आशंका गरिएको छ ।

फर्ममा माउ तथा पाठापाठी गरेर ९० बाख्रा रहेकामा ११ वटा जलेर मरेका फर्म सञ्चालक ढकालले बताउनुभयो । विदेशी भूमिमा २० वर्ष रोजगारी गरेर स्वदेश फर्किनुभएका ढकालले ६ वर्ष अघिदेखि फर्म सञ्चालन गर्दै आउनुभएको थियो ।