वालिङ,२ माघ- वालिङ महोत्सव अपाङ्ग मैत्री हुने भएको छ । वालिङ उद्योग वाणिज्य संघको आयोजनामा यही माघ १८ देखि २८ गते सम्म वालिङ खेलमैदानमा सञ्चालन हुने महोत्सवमा शारीरिक रुपमा अशक्त भएका व्याक्तिहरुलाई मध्यनजर गरेर अपाङ्गता मैत्री स्टेज बनाउने तयारीमा जुटेको वालिङ उद्योग वाणिज्य संघका सचिव एवं महोत्सव प्रचारप्रसार समितिका संयोजक पिताम्बर खनाल(सुसिलले) जानकारी दिनुभयो ।

“हाम्रो गौरव हाम्रो शान, वालिङ महोत्सव हाम्रो पहिचान” भन्ने मुल नाराका साथ आयोजना गरिएको महोत्सवलाई व्यवस्थित रुपमा सञ्चालन गर्नका लागि विभिन्न तयारीहरु गरिएको समेत प्रचारप्रसार समितिका संयोजक खनालले बताउनुभयो ।

महोत्सव आवलोकनका लागि आउने दर्शकहरुलाई सहज रुपमा अवलोकन गर्न मिल्लनेगरी छुट्टाछुट्टै बस्ने व्यवस्था मिलाइने भएको छ । विद्यार्थी र शिक्षकलाई विद्यालयको पालो अनुसार निश्चित स्थानमा बसेर सहजरुपमा महोत्सवको अवलोकन गर्न मिल्लने गरि कार्य अगाडी बढाइएको छ ।

महोत्सवमा जिल्लाका सबै पालिकाको आफ्नो पहिचान झल्किने गरि स्टल राख्ने व्यवस्था समेत मिलाइने आयोजकले जनाएको छ । महोत्सवमा जिल्लामा उत्पादन भएका कृषिजन्य वस्तुहरुका साथै विभिन्न वस्तुहरु प्रदर्शनीमा राखिने छ ।

महोत्सवको तयारी तिब्र रुपमा अगाडी बढेको वालिङ उद्योग वाणिज्य संघका अध्यक्ष चेतनारायण श्रेष्ठले बताउनुभयो । वालिङ खेलमैदानमा सञ्चालन हुने आठौं महोत्सवले यस क्षेत्रको विकासमा थप सहयोग पुग्ने आयोजकको भनाइ रहेको छ ।