वालिङ,२८भदौ- भीरकोट नगरपालिकामा डेंगु र सापु संक्रमण सम्बन्धी अभिमुखीकरण कार्यक्रम सम्पन्न भएको छ । भीरकोट नगरपालिका स्वास्थ्य कार्यालयद्वारा आयोजित कार्यक्रममा डेंगु तथा सापु संक्रमणको अवस्था, रोकथाम, उपचार र नियन्त्रणका विषयमा सरोकारवालाहरुसंग अभिमुखीकरण गरिएको हो ।
कार्यक्रममा नगरप्रमुख गोविन्दकुमार कर्माचार्यले यस्ता मौसमजन्य संक्रमणबाट बच्नका लागि सतर्क हुनुपर्ने बताउनुभयो ।

अधिकांस रोगहरु दुषित खानपान, दुषित हावापानी, व्यक्तिगत सरसफाईमा ध्यान नदिँदा हुने भएकाले यसप्रति सचेत हुनुपर्ने उहाँले बताउनुभयो । यस्ता प्रकारका संक्रमणको समयमै रोकथाम गरी महामारीजन्य अवस्थाबाट बच्न आम नागरिकको पनि साथ र सहयोग रहनुपर्ने नगरप्रमुख कर्माचार्यको भनाइ थियो ।
कार्यक्रममा नगरपालिकाले लामछुट्टेका लार्भा खोज र नष्ट गर अभियानलाई अगाडि बढाउने, नागरिकलाई सचेत पार्नका लागि आवश्यक जनचेतनामुलक कार्यक्रमहरु गर्ने नगरपालिका प्रमुख प्रशासकिय अधिकृत धर्मराज ढुंगानाले बताउनुभयो ।