काठमाडौं,७ जेठ– संविधानको धारा ७६ को उपधारा ५ बमोजिमको सरकार गठनका लागि नेकपा एमालेका अध्यक्ष केपी शर्मा ओली र नेपाली कांग्रेसका सभापति शेरबहादुर देउवाले आ–आफ्नो दाबी पेश गर्नुभएको छ ।
राष्ट्रपतिले प्रतिनिधिसभाका दुई वा दुईभन्दा बढी दलको बहुमतसहित दाबी पेश गर्न दिएको समयभित्र ओली र देउवाले आफ्नो बहुमत रहेको भन्दै दाबी पेश गर्नुभएको होे ।
साँझ ५ बजेभित्र दाबी पेश गर्न भनिएकोमा ओली साढे ४ बजे नै बहुमत दाबी गरेर शीतल निवासबाट बाहिरिनुभएको थियो भने देउवा पौने पाँच बजे दाबी पेश गरेर बाहिरिनुभएको हो ।
एमाले अध्यक्ष ओलीले नेकपा एमाले र जसपाका १५३ जना सांसदको समर्थन रहेको दाबी गर्नुभएको छ । उहाँलाई जसपा अध्यक्ष महन्थ ठाकुर र संसदीय दलका नेता राजेन्द्र महतोले पार्टीको समर्थन रहेको लिखित पत्र दिनुभएको छ । भने देउवाले कांग्रेस,माओवादी,जसपाका अध्यक्ष उपेन्द्र यादव र एमालेका माधव नेपाल पक्षको समर्थनमा १४९ जना सांसदको हस्ताक्षर बुझाउनुभएको हो ।

दुबै पक्षले बहुमत दाबी गरेकोले राष्ट्रपतिले दुबैले प्रस्तुत गरेको आधार अध्ययन गर्ने राष्ट्रपति कार्यालय स्रोतले जनाएको छ ।