सिर्जना घिमिरे
पाल्पा,६ जेठ– लुम्बिनी प्रदेशका स्वास्थ्य तथा जनसंख्यामन्त्री भोजप्रसाद श्रेष्ठले अक्सिजनको अभावमा जनताले ज्यान गुमाउनुपर्ने अवस्था आउन नदिने बताउनुभएको छ ।
गृहजिल्ला पाल्पाको विभिन्न अस्पताल तथा स्वाश्थ्यसंस्थाको अवलोकन निरीक्षणका क्रममा उहाँले करिब ३५ सय सिलिण्डर अक्सिजन माग भएको लुम्बिनी प्रदेशमा २१ सयको हाराहारीमा उत्पादन हुदै आएको र थप आवश्यक अक्सिजन आयात गर्ने प्रक्रियामा रहेको बताउनुभयो ।
अहिलेको समयमा पुल र सडक लगायत पूर्वाधार विकासको कामलाई छोडेर सरकार कोभिड नियन्त्रणमा लागि सकेको र सरकारको सारा ध्यान कोभिडको नियन्त्रणमा केद्रित भएकोमा बताउदै मन्त्री श्रेष्ठले जनप्रतिनिधीहरुलाई आफु बचेर अरुलाई बचाउने अभियानमा खटेर लाग्न अनुरोध गर्नुभयो । भाषण र प्रचारमा मात्रै नभएर प्रतिफल आउने गरी जनप्रतितनिधी र कर्मचारीहरुले एकताबद्ध भएर काम गर्नु पर्नेमा मन्त्री श्रेष्ठले जोड दिनुभयो ।

पाल्पा अस्पताललाई अक्सिजन प्लान्ट निर्माण, रामपुर अस्पतालमा अक्सिजन सिलिण्डर अभाव हुन नदिने उहाँको भनाइ थियो । रामपुर अस्पतालमा अक्सिजन अभाव हुन नदिन प्रदेश सरकारले १५ लाख तथा स्थानिय सरकारले पनि पहल गरेको उल्लेख गर्नुभयो । नागरिकको ज्यान बचाउने अभियानमा केन्द्र, प्रदेश र स्थानीय सरकार हातमालो गरेर अघि बढ्ने मन्त्री श्रेष्ठको भनइ थियो । मन्त्री श्रेष्ठले तानसेन र रामपुरमा रहेका अस्पतालको निरीक्षण गर्नुभएको थियो ।