वालिङ,२७ वैशाख– स्याङ्जामा कोरोना संक्रमणका कारण थप चार जना मृत्यु भएको छ । वालिङकी एक महिला, हरिनासाका एक पुरुष, फेँदिखोला गाउँपालिकाकी एक महिला र गल्याङका पुरुष सहित जिल्लामा थप चार संक्रमितको पोखरामा मृत्यु भएको हो ।
वालिङ १ की ६४ वर्षीया महिलाको चरक मेमोरियल अस्पताल पोखरामा उपचारको क्रममा सोमबार मृत्यु भएको हो भने हरिनाास गाउँपालिका ४ का ५५ वर्षीय कोरोना संक्रमित पुरुषको मणिपाल शिक्षण अस्पतालमा उपचारको क्रममा मृत्यु भएको छ ।
वालिङकी महिलालाई १७ गते संक्रमण पुष्टी भएको हो । उनमा निमोनिया, मुटुको समस्या जस्ता समस्या थियो भने हरिनासका पुरुषमा आईतबार मात्रै संक्रमण पुष्टी भएको थियो ।

त्यस्तै फेदीखोला गाउँपालिका ९ की ६२ वर्षीया कोरोना संक्रमित महिलाको आईतबार साँझ गण्डकी मेडिकल कलेजमा मृत्यु भएको हो । ती महिलामा यही बैसाख २३ गते संक्रमण पुष्टी भएको थियो । गल्याङ नगरपालिका ३ का ८४ वर्षीय कोरोना संक्रमित पुरुषको भने चरक मेमोरियल पोखरामा मृत्यु भएको हो । ती पुरुषमा वैशाख २१ गते संक्रमण पुष्टी भएको थियो ।