गल्याङ,२२ वैशाख– देशैभर चुनावको रौनक छाइरहेका बेला स्याङ्जाको गल्याङ नगरपालिकामा भने कुकुरहरुको बन्ध्याकरण शिविर सञ्चालन गरिएको छ । गल्याङ बजार क्षेत्रका छाडा कुकुरका साथै घरमा पालिएका कुकुरलाई लक्षित गरि बन्ध्याकरण शिविर सञ्चालन गरिएको हो ।

भेटेरनरी अस्पताल तथा पशु सेवा विज्ञ केन्द्र स्याङ्जाको आयोजना तथा केन्द्रीय रिफरल पशु चिकित्सालय, काठमाडौंको प्राविधिक सहयोग एवम् गल्याङ नगरपालिकाकोे व्यवस्थापनमा सञ्चालन गरिएको शिविरमा १ सय ११ कुकुरको बन्ध्याकरण गर्नुका साथै रेविज विरुद्वको खोप लगाइएको छ ।

घरमा पालेका कुकुरहरुको सुरक्षा एवं सडकमा रहेका कुकुरहरुको न्युनिकरणका लागि अभियानको रुपमा एक दिने शिविरको आयोजना गरिएको केन्द्रीय रिफरल पशु चिकित्सालय काठमाडौंका पशु चिकित्सक डाक्टर टंक प्रसाईले जानकारी दिनुभयो ।
गल्याङ नगरपालिकामा कुकुर पाल्नेहरुको संख्या बढिरहेको र सडकमा रहेका कुकुरहरुले सवारी दुर्घटना समेत गराउन सक्ने भएकोले शिविर सञ्चालन गरिएको गल्याङ नगरपालिका पशु सेवा शाखा प्रमुख सुशिल अर्यालले बताउनुभयो ।

मानवलाई असर गर्ने रेविज रोग नियन्त्रणका लागि गल्याङमा यसअघि पनि निशुल्क खोपको व्यवस्था गर्ने गरिएकोभए पनि बन्ध्याकरण शिविर भने पहिलोपटक गरिएको हो । शिविर सञ्चालनका लागि काठमाडौंबाट तीन जना सर्जन विशेषज्ञ सहितको टोली खटिएको छ । मुख्यत सडकमा हुने बेवारिसे कुकुरहरुका कारण दुर्घटनाको जोखिम बढ्ने गरेको अवस्थामा बन्ध्याकरण शिविरले बजार क्षेत्रमा हुने त्यस्ता कुकुरको संख्या घट्नगइ दुर्घटनामा कमिआउने नगरपालिकाले जनाएको छ ।