स्याङ्जा,३ असोज– पुतलीबजार नगरपालिकामा तरकारीका ५ लाख विरुवा वितरण गर्ने अभियान सञ्चालनमा ल्याइएको छ । नगरपालिका, यूएनडिपि नेपालको आर्थिक तथा प्राविधिक सहयोग र सूर्योदय क्लब स्याङ्जाको ब्यवस्थापनमा “कोभिड(१९ उद्दार र सामाजिक आर्थिक प्रतिकार्य पहल” कार्यक्रम पुतलीबजार नगरपालिकाका १४ वटै वडाहरूमा सञ्चालनमा आएको छ ।

कोभिड १९ बाट प्रभावित समुदायको आर्थिक तथा सामाजिक स्तर माथी उठाउने प्रमुख उद्देश्य रहेको सूर्योदय क्लबका अध्यक्ष अनन्त कुमार श्रेष्ठले बताउनुभयो । यस कार्यक्रम अन्तरगत कृषि, पशु तथा उद्मशिलताका विविध क्रियाकलापहरू सञ्चालनमा रहेकाछन । पुतलीबजार नगरपालिकालाई तरकारीमा आत्मनिर्भर बनाउन एक टोल एक नर्सरी एक घर एक नर्सरी कार्यक्रम लागू गरिएको हो ।

नगरका १४ वटा वडाका २ सय ९५ टोल विकास संस्थाहरू मध्ये २ सय ८७ टोल विकास संस्थाले छनोट गरेका नर्सरी धनीलाई नर्सरी स्थापना तथा ब्यवस्थापन सम्बन्धी प्रत्येक वडामा कृषि प्राविधिकहरूद्वारा तालिम प्रदान गरिएको थियो । हरेक टोलमा नर्सरी स्थापनाका लागि बिउविजन नर्सरी पलाष्टिक निशुल्क, काउली, बन्दा, ब्रोकाउली, मुला, रायोको बिउ प्लास्टिक लगायतका सामग्रीहरु वितरण गरिएको थियो ।

अगोटे जातका तरकारीका करिव ५ लाख बेर्ना उत्पादन गरी घर घरमा वितरण गर्ने कार्यक्रम रहेको क्लवका अध्यक्ष श्रेष्ठले जानकारी दिनुभयो ।
नगरलाई तरकारीमा आत्मनिर्भर बनाउन बिउविजनदेखि प्राविधक सहयोग उपलब्ध गराएको नगर प्रमुख सीमा कुमारी क्षेत्रीले बताउनु भयो ।

नगरप्रमुख क्षेत्रीले भन्नुभयो, “नगरपालिका नगरवासिलाई घरयासी प्रयोजनका साथै ब्यावसायीक तरकारी खेती गरेर आर्थिक पाटोलाई सहयोग पुर्याउने योजना अनुसार काम गरिरहेकाछौ ।” यो अभियानले जागरहुने र मेहनती किसानहरुलाई उद्यमी बनाउन सहयोग पुग्ने नगरप्रमुख क्षेत्रीको भनाइ थियो ।