तस्वीरः सौजन्य जिल्ला प्रहरी कार्यालय
वालिङ,२० साउन– जिल्लामा कोरोना भाइरसको संक्रमण बढे संगै प्रहरीले जनचेतना मुलक कार्यक्रम तपाईको मास्क खोइ ? अभियानको सुरुवात गरेको छ । प्रहरीले मास्क नलाएका ब्यक्तिहरुलाई सोधपुछ गर्नुका साथै मास्क उपलब्ध गराउने गरेको छ ।

जिल्ला प्रहरी कार्यालयले सदरमुकाम, वडा कार्यालय वालिङले वालिङमा र इलाका प्रहरी कार्यालय चापाकोट लगायतका प्रहरी चौकीहरुले आआफ्नो क्षेत्रमा मास्क खोइ अभियान सुरु गरेको जिल्ला प्रहरी कार्यालयका प्रहरी निरीक्षक पदमराज थापाले जानकारी दिनुभयो ।
जिल्लाको बजार क्षेत्रमा कोभिडको तेस्रो लहरका बारेमा जनचेतना सम्बन्धी माइकिङ गरेको जिल्ला प्रहरी कार्यालले जनाएको छ । कोभिड संक्रमणबाट सुरक्षित रहनको लागि अपनाउनुपर्ने सावधानी मुलक माईकिङ, पर्चा पम्पलेट वितरण गर्नुका साथै मास्क नलगाइ हिँड्ने यात्री, सवारी चालक, सहचालकलाई मास्क उपलब्ध गराएको छ । मास्क अभियान सहित जनचेतनामूलक कार्यक्रम सञ्चालनको लागि कार्यालयले प्रहरी निरीक्षक अर्जुन बि.क को कमाण्डमा १६ जना प्रहरीको टोली खटाएको छ ।

केही दिनयता स्याङजामा कोरोना संक्रमितको संख्या ह्वात्तै बढेको छ । जिल्लामा बुधबार यो समाचार तयार पार्दा सम्म ५ हजार ३ सय ७९ जनामा संक्रमण पुष्टि भएको छ भने ४ हजार ७ सय ३४ जना निको भएका छन् । जस मध्ये ५ सय १४ जना सक्रिय संक्रमित छ भने १ सय ३१ जनाको मृत्यु भएको छ । जिल्लामा ३ जनामा नयाँ डेल्टा भाइरस समेत देखिएको छ ।