वालिङ,२४ असार– कृषि पेशामा लागेर उदाहरणीय व्यक्ति बनेका वालिङका उद्यमीहरुलाई पुरस्कृत गरिएको छ । उत्कृष्ट व्यवसायीक सोचलाई व्यवहारमा उतार्न सफल भएको भन्दै उनीहरुलाई नगद सहित पुरस्कृत गरिएको वालिङ नगरपालिकाले जनाएको छ । कार्यक्रममा बोल्दै वालिङ नगरपालिकाका प्रमुख दिलिप प्रताप खाँणले उद्यमशीलताको प्रवद्र्धनले उत्पादन बढाउन सकिने बताउनु भएको छ । उहाँले युएनडिपीसँगको आर्थिक साझेदारीमा कृषि क्षेत्रमा नगरपालिकाले काम गरिरहेको जानकारी गराउनु भयो ।

नगरउपप्रमुख कल्पना तिवारीले अनुदानमा प्राप्त सामाग्रीहरु सबैले मिलेर प्रयोग गर्न आग्रह गर्नुभयो । उहाँले भन्नुभयो, ‘सामाग्रीको सही तथा सामुहिक प्रयोगमा जोड दिनुहोस् । नगरपालिकाका प्रमुख प्रशासकीय अधिकृत राजन भट्टराईले माटो सुहाउदो कृषि खेतीलाई नगरपालिकाले प्राथमिकता दिएर काम गरिरहेको बताउनु भयो ।

कार्यक्रममा बोल्दै दियालो संस्थाका अध्यक्ष कविता तिवारीले उत्कृष्ट र उदाहरणीय काम गरिरहेका कृषि उद्यमीहरुलाई पुरस्कृत गरिएको बताउनु भयो । उहाँले भन्नुभयो, ‘कृषकको माग र आवश्यक्ता तथा वडाको सिफारिसमा आवश्यक कृषि औजारहरु वितरण गरिएको हो ।’
युएनडिपी नेपाल र वालिङ नगरपालिकाको आर्थिक सहयोगमा दियालो संस्थाद्वारा सञ्चालित कोभिड १९ उद्धार र सामाजिक आर्थिक प्रतिकार्य परियोजना अन्तर्गत कृषकलाई पुरस्कृत गर्नुका साथै सामाग्री वितरण गरिएको हो ।
कृषि कर्ममा राम्रो काम गरेर उदाहरणीय बनेका ९ जना उद्यमीहरुलाई प्रशंसा स्वरुप नगद रु १० हजार तथा प्रमाणपत्रले पुरस्कृत गरिएको कार्यक्रम प्रमुख राधाकृष्ण डुम्रेले जानकारी दिनुभयो । त्यस्तै १६ जना कृषकलाई गोठसुधार कार्यक्रम अन्तरगत साझेदारीमा सहयोग गरिएको उहाँले बताउनु भयो । सो अवसरमा चापकटर, टनेल, ठेला लगायतका कृषि सामग्री समेत प्रदान गरिएको छ ।