पोखरा,२० जेठ– गण्डकी प्रदेशसभाका सदस्य कृष्ण थापा पदमुक्त हुनुभएको छ । राष्ट्रिय जनमोर्चाका प्रदेशसभा सदस्य थापालाई दलबाट निष्कासन गरेको जानकारी पार्टीले प्रदेशसभा सचिवालयमा गराएसँगै सभामुख नेत्रनाथ अधिकारीले बिहीबार नै १ बजे सुरु भएको प्रदेशसभा बैठकमा थापालाई दलबाट निष्कासन गरेको पत्र आएको जानकारी दिनुभयो ।

थापाले पार्टीको निर्णय विपरीत काम गरेको भन्दै कारबाही गरेको राष्ट्रिय जनमोर्चाले जनाएको छ । सरकारविरुद्ध ल्याएको अविश्वासको प्रस्तावमाथि दलले समर्थन गरे पनि थापाले पार्टीको निर्देशन विपरीत एमालेलाई सहयोग गर्दै आउनुभएको थियो ।

बागलुङ–१ ‘ख’ बाट प्रत्यक्ष निर्वाचित सांसद थापालाई जनमोर्चाले साधारण सदस्य पनि नरहने गरी एक वर्षको लागि निलम्बन गरेको थियो । ६० सदस्यीय गण्डकी प्रदेशसभा थापा पदमुक्त भएपछि ५९ सदस्यीय भएको छ । प्रदेशसभामा राष्ट्रिय जनमोर्चाका ३ जना सांसद रहेकामा अब २ जना मात्र रहने भएका छन् ।