स्याङ्जा,१२ जेठ– फेदीखोला गाउँपालिकाले आर्थिक अवस्था कम्जोर भएका गाउँपालिका बासिलाई आर्थिक सहयोग गर्ने भएको छ ।
कोरोना भाइरस (कोभिड १९) को दोस्रो संक्रमण बढ्दै गएको अवस्थामा पनि गाउँपालिकामा संक्रमणदेखिएका बिरामीहरु स्वास्थ्य परीक्षणमा चासो नदेखाएको र आर्थिक अवस्था कम्जोर हुदा उपचारमा समस्या आएको भन्दै गाउँपालिकाले पालिका बासिलाई उपचारमा हौसला प्रदान गर्न आर्थिक सहयोग गर्ने निर्णय गरेको गाउँपालिकाले जनाएको छ ।
गाउँपालिका अध्यक्ष घनश्याम सुवेदीले पैशाको अभावमा उपचारमा समस्या नहोस भनेर अर्थिक अवस्था कमजोर भएका पालिका बासिलाई उपचारमा सहयोग पुगोस भनेर १५ हजार रुपैया सम्म दिने निर्णय भएको बताउनुभयो । अध्यक्ष सुवेदीले भन्नुभयो, “कोरोना पोजेटिभ देखिए पनि अर्थिक अभावमा अस्पताल नगएर घरमै थलिएर बसेको अवस्थामा पालिकाले दिने उपचार खर्चले सहयोग पुगछ र यसले संक्रमणलाई लुकाउने कार्यमा कमि आउछ ।”
बिरामीले अस्पतालमा स्वास्थ्य उपचार गराएको कागजपत्रका आधारमा गाउँपालिकाको कार्यलयमा उपचार खर्च गरेको अवस्थामा रकम उपलब्ध गराउने अध्यक्ष सुवेदीले बताउनुभयो ।
गाउँपालिकाका प्रशासकीय प्रमुख चिरञ्जीवी बरालले गाउँपालिका भीत्र ४९ जना संक्रमित रहेको र जसमध्ये ९ जना संक्रमण निको भएर घर फर्किएको र १ जना संक्रमित महिलाको मृत्यु भएको जानकारी दिनुभयो । गाउँपालिकाले कोरोना महामारीमा स्वास्थ्य उपचारमा सहयोग पर्याउने उद्देश्य अनुसार पालिका भित्र दुई ओटा एम्बुलेन्स सञ्चालनमा ल्याएको र कोरोना संक्रमित बरामी र सुत्केरी महिलाहरुको उपचारका लागि छुट्टाछुट्टै एम्बुलन्स द्वारा निशुल्क सेवा समेत दिदै आएको प्रशासकीय प्रमुख बरालले बताउनुभयो । गाउँपालिकाले २० शैयाको अक्सिजन सहितको अस्पताल सञ्चालनमा ल्याएको र कोरोना संक्रमितहरुलाई संक्रमितको घरघरमै पुगेर औषधी समेत बितरण गर्दै आएको गाउँपालिकाले जनाएको छ ।

जिल्लामा यो समाचार तयार पार्दा सम्म कुल १ हजार ८ सय ६९ जना संक्रमित भएकाछन् भने ३ सय २० जना निको भएर घर फर्किएकाछन् ।
मृत्यु हुनेहरुको संख्या ८१ पुगेको छ भने ६१ जना संक्रमितको बिभिन्न अस्पतालमा उपचार भइरहेको जिल्ला स्वास्थ्य कार्यालयका सूचना अधिकारी मित्रप्रसाद अर्यालले जानकारी दिनुभयो । जिल्ला स्वास्थ्य कार्यालयले दिएको जानारी अनुसार होम आइसोलेसनमा १ हजार ३ सय ७० जना रहेकाछन् भने क्वारिन्टिनमा ३६ जना रहेकान् । जिल्लामा ३ सय १७ आइसोलेसन बेड र २ सय ४९ अक्सिजन सिलिण्डर रहेको स्वास्थ्य कार्यालयले जनाएको छ ।