वालिङ,२७ माघ–वालिङ नगरपालिका ८ छेउडाडामा प्रविधिको प्रयोग गरी दुनाटपरी बनाउने तालिम शुरु भएको छ । तालिमको शुभारम्भ गर्दै वालिङ नगरपालिकाका उपप्रमुख कल्पना तिवारीले स्थानीय स्रोत साधनको सही उपयोग गर्ने रणनीतिलाई नगरपालिकाले जोड दिएको बताउनु भयो । उपप्रमुख तिवारीले स्थानीय स्रोतको सही र दीगो उपयोगले मात्रै आर्थिक प्रगती सम्भव भएको बताउनुभयो ।
स्थानीय स्तरमा सहजै पाइने कच्चा पदार्थको प्रयोग गरी दुनाटपरी बनाउन सकिने भन्दै नगर उपप्रमुख तिवारीले प्लाष्टिकजन्य उपभोगलाई क्रमश कम गर्दै लैजानु पर्नेमा जोड दिनुभयो ।
वालिङ नगरपालिका र संयुक्त राष्ट्रसंघीय विकास कार्यक्रम (युएनडिपी) को आर्थिक सहयोग तथा दियालो संस्थाको व्यवस्थापनमा वालिङमा सञ्चालित “कोभिड १९ उद्धार र सामाजिक आर्थिक प्रतिकार्य परियोजना” अन्तर्गत व्यवशायीक रुपमा दुनाटपरी उत्पादन गर्ने लक्ष्यका साथ तालिम शुरु भएको हो । तालिममा स्थानीय छेउडाँडा शील्पकला समूहले सहजीकरण गरिरहेको स्थानीय समाजसेवी तथा कार्यपालिका सदस्य गीता रणपालले जानकारी दिनुभयो ।
वालिङ नगरपालिकाका प्रमुख प्रशासकीय अधिकृत जीवन ज्ञवालीले स्थानीय स्तरमा उत्पादन हुने दुनाटपरीको वालिङमा राम्रो सम्भावना रहेको बताउनु भयो । नयाँ कामको थालनी प्रति पंशसा गर्दै अधिकृत ज्ञवालीले कोभिड १९ को कारण रोजगारी गुमाएकाहरुलाई स्वरोजगार बनाउन सहयोग पुग्ने ज्ञवालीले बताउनुभयो ।
कार्यक्रममा वडा नम्वर ८ का अध्यक्ष कमल प्रसाद सुवेदी, दियालो संस्थाका अध्यक्ष कविता तिवारी दियालो युएनडिपीका कार्यक्रम प्रमुख राधाकृष्ण डुम्रे, लगायतले बोलेका थिए । तीन दिन सम्म चल्ने तालिममा तालिममा ३० जनाको सहभागिता रहेको छ ।