स्याङ्जा,२३ माघ–आँधीखोला गाउँपालिकाको आठौं गाउँ सभा शुक्रवार सम्पन्न भएको छ ।
विश्वभरिनै महामारीको रूपमा फैलिरहेको कोरोना भाइरस (कोभिड १९) कारण विश्व नै समस्यामा परेता पनि आँधीखोला गाउँपालिकामा विकाशले गति लिएको गाउँपालिकाका अध्यक्ष सुधिरकुमार पौडेलले बताउनुभयो । अध्यक्ष पौडेलले भन्नुभयो, “कोरोना संक्रमणका कारण विकास निर्माण संगै अन्य कामहरुमा केही अवरोध सिर्जना भएपनि हामीले त्यसको व्यवस्थापन गर्दै अगाडी बढ्न सफल भयौं । अहिलेको अवस्थामा ७५ प्रतिशत काम सम्पन्न गर्नु चान्चुने कुरा होइन यसलाई उपलब्धीनै मान्नुपर्छ ।”

उपाध्यक्ष शर्मिला देवी पौडेलले आठौं गाउँसभाका प्रस्तावहरू सभामा पेस गर्नुभएको थियो । उपाध्यक्ष पौडेलले आर्थिक वर्ष २०७७।०७८ को आर्थिक तथा विनियोजन ऐन संशोधन सहितको आर्थिक प्रतिवेदन प्रस्तुत गर्नु भएको थियो । प्रतिवेदन अनुसार आँधीखोला गाउँपालिकाको चालू खर्च २ करोड ३२ लाख (३२ प्रतिशत), पुँजीगत खर्च २ करोड २७ लाख (१७ प्रतिशत) रहेको छ भने संघीय सरकार सशर्त अनुदान तर्फको खर्च ६ करोड ५० लाख (३१ प्रतिशत) रहेको छ ।
सभाले आँधीखोला गाउँपालिकाले आर्थिक वर्ष २०७७।७८ को शंसोधीत बजेट मन्तव्य, जलचर संरक्षण र व्यवस्थापन गर्न बनेको विधेयक २०७७ र स्थानीय तहमा वातावरण तथा प्राकृतिक स्रोतको संरक्षण सम्बन्धमा व्यवस्था गर्न बनेको विधेयक २०७७ सर्वसम्मतले पारित गरेको छ ।