वालिङ,२३ माघ– वालिङका चार युवाले सामूहिक लगानीमा फुटसल सञ्चालनमा ल्याएकाछन् । वालिङ नगरपालिका १० का चार जना युवा मिलेर एक करोडको लगानीमा तल्लो वालिङमा वालिङ फुटसल कोर्ट स्थापना गरी खेल सञ्चालन गरेका हुन् ।
सोमबहादुर मल्ल, अन्दाज थकाली, बीरेन्द्रध्वज मल्ल र अनिशमान श्रेष्ठको सामूहिक लगानीमा ईन्डोर फुटसल सञ्चालनमा आएको हो ।
फुटसलको उद्घाटन गर्दै वालिङ नगरपालिकाका प्रमुख दिलीपप्रताप खाँणले फुटसलले खेलको विकासका लागि महत्वपूर्ण भूमिका खेल्ने बताउनुभयो । वालिङ तथा आसपासका खेलाडीहरुको क्षमता प्रष्फुटन गर्नुकासाथै नयाँ खेलाडीहरु उत्पादन गर्नका लागि सहयोग पुग्ने नगरप्रमुख खाँणको भनाइ थियो ।
“फुटसलले पक्कै पनि खेलकुदप्रति आकर्षण गर्नुकासाथै स्वास्थ्यका दृष्टिले पनि महत्वपूर्ण भूमिका खेल्ने छ” नगर प्रमुख खाँणले भन्नुभयो, “खेलकुदका क्षेत्रमा गरिएको खर्च, खर्च नभई लगानी हो । यसले पछि उपलब्धी दिदैं जाने छ ।”

कार्यक्रममा उप प्रमुख कल्पना तिवारीले खेललाई ब्यवसायिकतासँग जोड्दै अगाडि बढाउनु आवश्यक रहेको बताउनुभयो । उहाँले लुकेर रहेका प्रतिभावान खेलाडीहरुको खोजी तथा खेल क्षेत्रको विकासका लागि सहयोग पुग्ने बताउनुभयो । फुटसल उद्घाटनका क्रममा खेल क्षेत्रमा महत्वपूर्ण योगदान दिने ब्यक्तिहरुलाई सम्मान गरिएको थियो ।