वालिङ, ६ माघ– माटोको उत्पादन क्षमता कम हुँदै जाँदा अन्न बाली उत्पादनमा ह्रास आएपछि आँधीखोला गाउँपालिकाले माटो परीक्षणको अभियान सञ्चालन गरेको छ । माटो परीक्षण गरेर माटो सुहाउदो खेती लगाउन किसानलाई प्रोत्साहान गर्ने योजना अनुसार गाउँपालिकाले सोमबारदेखि एक हप्ते माटो परीक्षण सप्ताहाको शुरु गरेको हो । गाउँपालिकाले ६ वटै वडाका किसानबाट माटोको नमुना संकलन गरेर माटो परीक्षण गर्न शुरु गरेको हो । माटो परीक्षणको नतिजा अनुसार कृषकलाई मलको प्रयोग, मौसम अनुकूलका बाली तथा बाली लगाउने विधिका बारेमा जानकारी गराउने र निःशुल्क रूपमा कृषि चुन वितरण गर्ने उद्देश्यले माटो परीक्षण शुरु गरिएको गाउँपालिका अध्यक्ष सुधिरकुमार पौडेलले बताउनुभयो ।
दिगो कृषि उत्पादनका लागि गाउँपालिका क्षेत्र भित्रको माटोको पहिचान गरी माटोको गुणस्तरअनुसार खाद्यान्न तथा तरकारी उत्पादन क्षेत्रका रूपमा विकास गरिने अध्यक्ष पौडेलले बताउनुभयो । माटो परीक्षण पश्चात आवश्यक अनुसार कृषकलाई सहयोग गरिने अध्यक्ष पौडेलको भनाई रहेको छ ।
गाउँपालिकाका सबै वडाको विभिन्न स्थानबाट नमुनाका रूपमा करिब ६ सय कृषकको माटो परीक्षण गरिने गाउँपालिकाका प्रमुख प्रशासकीय अधिकृत शेषकान्त पौडेलले जानकारी दिनुभयो । व्यावसायिक रूपमा तरकारी खेती गर्न चाहने कृषकहरुलाई माटो परीक्षणले ठूलो सहयोग पुग्ने पौडेलको भनाइ रहेको छ । माटो परीक्षणका फाइदाबारे सबै वडा वासीलाई जानकारी गराएपछि नमुनाका रूपमा माटो परीक्षण गर्न सुरु गरिएको गाउँपालिकाले जनाएको छ ।