वालिङ,१ असाेज- वालिङ नगरपालिका–६ पाडेटारीमा हाइस र मोटरसाइकल एकआपसमा ठोक्किँदा दुई जना घाइते भएका छन्।

बिहीबार दिउँसो मिर्दीबाट चापाकोटतर्फ जाँदै गरेको ग.१ ज. ८४३७ नम्बरको ईभी हाइस र विपरीत दिशाबाट आउँदै गरेको लु.९६ प. ५९४७ नम्बरको मोटरसाइकल एक आपसमा ठोक्किएकाे जिल्ला प्रहरी कार्यालय स्याङ्जाले जनाएकाे छ।

दुर्घटनामा मोटरसाइकल चालक पाल्पा रामपुर नगरपालिका–५ का ३२ वर्षीय सुरज अधिकारी र मोटरसाइकलमा सवार सोही ठाउँका २३ वर्षीय सरोज विक घाइते भएका छन्। अधिकारीको टाउको र अनुहारमा चोट लागेको छ भने विकको बायाँ हात र टाउकोमा चोट लागेको प्रहरीले जनाएको छ।

 घाइते दुवै जनालाई गह्राै प्राथमिक अस्पताल वालिङमा सामान्य उपचारपछि थप उपचारका लागि गण्डकी अस्पताल पोखरा रिफर गरिएको छ।

 हाइस चालक स्याङ्जाको भिरकोट नगरपालिका–८ रिपका करिब ४९ वर्षीय चोकबहादुर गुरुङलाई प्रहरीले नियन्त्रणमा लिएर घटनाबारे थप अनुसन्धान भइरहेको जिल्ला प्रहरी कार्यालय स्याङ्जाका प्रहरी नायव उपरीक्षक 

रमेशदत्त अवस्थीले जानकारी दिनुभयाे।