मणि प्रसाद अर्याल

वालिङ,१४ वैशाख- वालिङ नगरपालिकाले छोरी जन्माउनेलाई गर्दै आएको निःशुल्क स्वास्थ्य बिमा प्रभावकारी बनेको छ । नगरपालिकाले यो आर्थिक वर्षदेखि छोरी जन्माउनेलाई निःशुल्क स्वास्थ्य बिमाको सुरु गरेको हो ।
छोरीहरुलाई समाजले दोस्रो दर्जाकारुपमा हेर्ने गरेको अवस्थामा नगरपालिकाले उक्त कार्यक्रम लागु गरेको नगर प्रमुख कृष्ण खाँणले बताउनुभयो । छोरीहरुलाई प्रोत्साहन गर्नुपर्ने नगर प्रमुख खाँणको भनाइ छ । आधा हिस्सा ओगटेका नारीहरुको सम्मानका साथै उनीहरुको मनोबल उच्च राख्न आवस्यक रहेको उहाँले बताउनुभयो । जहाँ नारीको सम्मान हुन्छ, त्यो समाज सुसंस्कृत र समुन्नत हुने भएकोले छोरीहरुको सम्मान गर्नुपर्ने नगरप्रमुख खाँणले बताउनुभयो । नगरप्रमुख खाँणले भन्नुभयो, “घर र समाजमा नारीहरुको महत्वपूणर् भूमिका रहँदा रहँदै पनि समानरुपमा सम्मान दिन सकिएको छैन ।” यसमा टेवा पुगोस भन्ने नगरपालिकाको उद्देश्यका साथ यो कार्यक्रम सञ्चालनमा ल्याएका हौँ । नगर उपप्रमुख कविता गैह्रेले निःशुल्क स्वास्थ्य बिमा कार्यक्रमले नारी उत्थानमा भूमिका खेल्ने बताउनुभयो । उहाँले नगरबासी आमा दिदी बहिनीले यो कार्यक्रममा सहभागी भई लाभ लिन समेत आग्रह गर्नुभयो ।
वालिङ नगरपालिकाले यो आर्थिक वर्षमा मात्र करिव ३ सय जना नागरिकको निशुल्क स्वस्थ्य बिमा गरेको नगरपालिकाले जनाएको छ ।