वालिङ,१० चैत- वालिङ नगरपालिकाका प्रमुख कृष्ण खांणले तीन वर्ष भित्रमा वालिङ नगरपालिकालाई क्षयरोग मुक्त बनाउने बताउनुभएकाे छ। “हो हामी क्षयरोग अन्त्य गछाैँ” भन्ने नाराका साथ वालिङ नगरपालिका वडा नम्बर १२ को सिर्सेकोट स्वास्थ्य चौकीमा आयोजित एक दिने क्षयरोग जाँच शिविरको उद्घाटन गर्दै नगरप्रमुख खांणले यस्तो बताउनुभएको हो । 

विभिन्न वडामा पुगेर घुम्ती शिविरमार्फत नागरिकलाई स्थानीय सरकारको प्रत्याभूति दिलाउनका लागि यस्ता कार्यक्रमको आयोजना गरिएको नगरप्रमुख खांणले बताउनुभयो । नागरिक स्वस्थ भए नगर स्वस्थ हुने बताउदै नागरिकलाई वडास्तरमा सहज रुपमा स्वास्थ्य सेवा प्रदान गरिएको प्रमुख खांणले भनाइ थियाे। 

कार्यक्रममा नगर उपप्रमुख कविता तिवारीले नगरपालिकाले परिणाम देखिनेगरी काम गरेको बताउनुभयाे। वालिङ नगरपालिकाभित्र ३९ जना क्षयरोग लागेका बिरामी रहेको तथ्याङ्कले देखाएको छ । जिल्लामा १ सय ३१ क्षयरोगका बिरामी रहेको तथ्याङ्क सार्वजनिक हुदाँ सबैभन्दा बढी बिरामी वालिङमै रहेको देखिएको छ ।

हरेक वडामा क्षयरोग शिविर आयोजना गर्दै क्षयरोग बिरामीको पहिचानलाई तिब्रता दिएको स्वास्थ्य शाखा प्रमुख कमल पाण्डेले बताउनुभयो । ६० जनाको स्वास्थ्य परिक्षण गर्दा ४० जना शंकास्पद र १२ जनाको खकार नमूना परीक्षणका लागि लिइएको पाण्डेले जानकारी दिनुभयाे। 

कार्यक्रममा वालिङलाई क्षयरोग मुक्त बनाउनका लागि जनप्रतिनिधि, स्वास्थ्यकर्मी तथा आम सर्वसाधारणले हस्ताक्षर समेत गरेका छन् । कार्यक्रममा अब टिबिलाई हटाउनु छ देशलाई जिताउनु छ लगायत लेखिएका प्लेकार्ड समेत प्रर्दशन गरिएको थियो नियमित खोकी लाग्नु, रुघाखोकी हुनु, खकारमा रगत देखा पर्नु, साँझपख ज्वरो आउनु, राति सुतेको बेलामा पसिना आउनु, तौल घट्दै जानु, खाना नरुच्नु क्षयरोगीमा देखिने टिबिका लक्षण हुन् । क्षयरोग एक व्यक्तिबाट अर्को व्यक्तिमा श्वासप्रश्वासको माध्यमबाट सर्छ ।