वालिङ,३ पुस- वालिङमा बुधबारदेखि राष्ट्रपति रनिङ शिल्ड प्रतियोगिता हुने भएको छ । वालिङ १० औद्योगिक ग्राममा हुने प्रतियोगिताकाे तयारी पुरा भएको नगरपपालिकाले जनाएकाे छ । प्रतियोगिताका लागि ग्राउण्ड सम्याउने, तारजाली राख्ने, मञ्च निर्माणलगायतका कार्य सम्पन्न भएको हो । 

राष्ट्रपति रनिङ शिल्ड प्रतियोगिताको बारेमा आज पत्रकार सम्मेलन गरेर खेलका बारेमा जानकारी गराइएकाे छ । पत्रकार सम्मेलनमा नगरप्रमुख कृष्ण खाँणले वालिङमा रहेका ओझेलमा परेका स्थानहरुलाई समेत अगाडि ल्याउनका उद्देश्यले प्रतियोगिता औद्योगिक ग्राममा आयोजना गरिएको बताउनुभयो । 

वालिङमा रहेका सार्वजानिक जग्गाहरुको संरक्षण पनि हुने र ओझेलमा परेका ठाउँको प्रचार समेत हुने भएपछि प्रतियोगिता फरक स्थानमा आयोजना गरिएको प्रमुख खाँणले बताउनुभयो । खेलाडी उत्पादनका लागि विद्यालय तहदेखि नै लाग्नुपर्ने भन्दै राष्ट्रपति रनिङ शिल्ड प्रतियोगिताले विद्यालय स्तरबाट खेलाडीहरु उत्पादन गर्न थप टेवा पुग्ने बताउदै खेलकुद प्रतियाेगितालाई आगामी दिनमा पनि निरन्तरता दिने नगरप्रमुख खाँणकाे भनाइ थियाे।

प्रतियोगितामा वालिङ भित्र रहेका सामुदायिक र संस्थागत गरी २६ विद्यालयका विद्यार्थीहरुकाे सहभागिता रहने छ।

प्रतियोगितामा भलिबल, मार्शल आर्टस्, एथ्लेटिक्स,कबड्डी लगायतका खेलहरु समावेश गरिएको खेल संयोजक दिपेन्द्र खाँणले बताउनुभयो ।