वालिङ,१ पुस- स्याङ्जाको वालिङ नगरपालिकामा कोडिभ- १९ भ्याक्सिन डिजिटलाइजेशन गरिने भएकाेछ। डिजिटलाइजेशन कार्यमा सहभागी हुने सहज कर्ताहरुकाे लागि आइतबार एक दिने अभिमुखीकरण कार्यक्रम सम्पन्न भएको छ ।कार्यक्रममा वालिङ नगरपालिका स्वास्थ्य शाखा प्रमुख कमलप्रसाद पाण्डेले सहभागिहरुलाई प्रशिक्षण दिनुभएकाे थियाे। सहजकर्तालाई काेभिड-१९ भ्याक्सिन (खोप) लगाएकाहरुको डाटा विद्युतीय माध्यमबाट प्रविष्टिकरण कसरी गर्ने भन्ने विषयमा पाण्डेले प्रयोगात्मक प्रशिक्षण प्रदान गर्नुभएको थियो ।

वालिङ नगरपालिकाको आयोजना युएनडिपिको आर्थिक सहयोग र उज्यालो यात्रा गैर सरकारी संस्थाको सहजीकरणमा संचालित कोभिड-१९ भ्याक्सिन डिजिटलाइजेशन कार्यक्रमकाे लागि नगरपालिकाकाे १४ वटा वडामा रहेका स्वास्थ्य चाैकीमा एक वडामा एक जना सहजकर्ताले डिजिटलाइजेशनकाे कार्य गर्ने गरी ब्यवस्था मिलाइएकाे उज्यालाे यात्राका अध्यक्ष हिमलाल पराजुलीले जानकारी दिनुभयाे ।

कोभिड १९ खोप लगाएकाहरुको तथ्याङक प्रविधिको माध्यममार्फत राख्नका लागि यो कार्यक्रम साेमबार देखि सञ्चालन गरिँदैछ ।

वैदेशिक रोजगारीलगायतका कार्यमा आवश्यक पर्ने कोभिड भ्याक्सिन प्रमाणपत्रका लागि विभिन्न स्थानबाट महङ्गो मूल्यमा निकाल्नुपर्ने बाध्यताको अन्त्य गर्दै नागरिकको कागजपत्र सुरक्षित राख्नका लागि यो कार्यक्रमले टेवा पुग्नेछ । भ्याक्सिन लगाएकाहरुको एकिन तथ्याङ्क कम्प्युटर सफ्वेयरमा हुने भएपछि आवश्यक परेको खण्डमा तुरुन्त र सजिलै उपलब्ध गराउन याे कार्यक्रमले सहयाेग पुर्याउने छ।