वालिङ,२५ फागुन– अन्तर्राष्ट्रिय श्रमिक नारी दिवसका अवसरमा रोटरी क्लब अफ वालिङले १० जना महिलाहरुलाई सम्मान गरेको छ । कार्यक्रममा संचार क्षेत्रका माध्यमबाट सामाजिक क्षेत्रमा योग्दान पुर्याएको भन्दै क्लबले गण्डकी समाचार डट कमकी कार्यकारी सम्पादक कला रानालाई सम्मान गरेको हो ।

यसै गरी वालिङमा रहेर विभिन्न क्षेत्रका माध्यमबाट महिला मुक्ति तथा महिलाहरुको प्रेरणाकोरुपमा काम गरेको बताउदै नारी दिवसको अवसरमा मोटिभेशनल कार्यक्रम गरी महिलाहरुलाई सम्मान गरिएको हो । सम्मानित हुनेहरुमा पूर्व महिला विकास अधिकृत कल्पना बस्याल, महिला उद्यमी दुर्गा न्यौपाने, अभिवक्रा संगिता नेपाली, सौन्दर्यकर्मी चुक्रकुमारी थापा दुर्गा, योग प्रशिक्षक कविता भुषाल, शिक्षक सोमुमाया राना, कृषक भिमा रेग्मी, खेलाडि अस्मिता रणपाल, कलाकार जुनु एकसे रहनुभएको छ ।

लैङ्गिक समानताको बलियो आधार सिर्जनात्मक प्रविधिमा महिला पहुँचको बिस्तार भन्ने नाराका साथ आयोजित ११३ औं अन्तर्राष्ट्रिय नारी दिवसमा विभिन्न क्षेत्रमा रहेर समाजमा योगदान पुर्याउनुभएको महिलाहरुको हौसला बढाउन सम्मान गरिएको रोटरी क्लब अफ वालिङकी अध्यक्ष सीता पाण्डे डुम्रेले बताउनुभयो ।

रोटरी क्लब अफ वालिङको आयोजनामा लायन्स क्लब, लायन्स क्लब ग्रिन होम, लियो क्लब, वालिङ जेसिज, रोट्याक क्लब, वालिङ साना कृषि सहकारी संस्था र ब्युटिपार्लर एशोसिएसनको समन्वयमा महिलाहरुलाई सम्मान गरिएको हो ।
कार्यक्रमा वालिङ नगरपालिका उपप्रमुख कविता तिवारीले वालिङ स्थित विभिन्न संस्था तथा क्लबहरुले आँफ्नो संस्थागत विकाससंगै समग्र वालिङको पहिचान स्थापित गर्न महत्वपुर्ण भुमिका खेल्दै आएको बताउनुभयो । संविधानमा प्रदत्त महिलाहरुको हक अधिकारको सशक्त कार्यान्वयनका लागि महिलाहरु एकतावद्ध हुनुपर्ने उहाँको भनाइ थियो ।

११३ औं अन्तर्राष्ट्रिय श्रमिक नारी दिवसको अवसरमा आयोजित मोटिभेशनल कार्यक्रममा उषा सिंह मल्लले सहजीकरण गर्नुभएको थियो ।