गोपाल जिटी

वालिङ,१६ फागुन- चापाकोटमा प्रस्तावित प्राकृतिक स्रोत व्यवस्थापन ( कृषि ) कलेज सञ्चालन हुने भएको छ । चापाकोट नगरपालिका वडा नम्बर ८ रत्नपुरमा कृषि कलेज सञ्चालन गरिने भएको हो । 

चापाकोट नगरपालिकाको आयोजनामा बुधबार प्रस्तावित प्राकृतिक स्रोत व्यवस्थापन कलेज सञ्चालन सम्बन्धमा वृहत छलफल कार्यक्रम मार्फत जानकारी गराइएको हो ।

कार्यक्रममा सम्वोधन गर्दै नेपाल सरकारका कानून न्याय तथा संसदीय मामिला मन्त्री धनराज गुरुङले विकासका कामहरु सबैको साझा काम भएको बताउनुभयो । कतिपय विकासका कामहरुमा राजनीति गरेको देखिन्छ, त्यो गलत भएको भन्दै मन्त्री गुरुङले विकासका काममा होइन, देश र जनताका लागि राजनीति गरिनुपर्ने बताउनु भएको हो । चापाकोटमा कृषि कलेज सञ्चालनका लागि आँफूलगाएत सबै दलका प्रतिनिधीको सहभागितामा प्रधानमन्त्री समक्ष कुरा राखेको मन्त्री गुरुङले उल्लेख गर्नुभयो । उहाँले भन्नुभयो-“ यहाँ कृषि कलेज सञ्चालनका लागि काङ्ग्रेस, एमाले, माओवादीलगायत सबै दलका प्रतिनिधिको पहलमा कुरा अगाडि बढेको हो । यो क्याम्पस यो वा त्यो कुनै पनि दल विशेषको होइन । यहाँ सबैजनाको पहलकदमी छ, सबैले अध्ययन गर्ने हो, लाभान्वित हुने हो । त्यसैले सबैको साझा काम र साझा उपलव्धी हुने छ ।”

हामीले चाहे जस्तो विकास नहुनुको कारण काममा गरिएको राजनीति भएको उहाँको भनाई छ । सत्तामा रहेकालाई प्रतिपक्षले सराप्ने र प्रतिपक्षमा रहेकालाई वास्ता नगर्ने नेपाली राजनीतिमा रहेको गलत प्रवृत्ति हो, यसलाई हामी सबैले त्याग्नुपर्छ । काम जे सुकै होस् आँफनो पार्टी बन्नुपर्छ भन्ने सोंचले नै विकासले फड्को मार्न नसकेको  हो । आँफू कहिल्यै पनि विकासका काममा त्यसरी नहेर्ने र त्यो पक्षमा नरहेको मन्त्री गुरुङले उल्लेख गर्नुभयो । त्यसैले चापाकोटमा बन्ने कृषि कलेज हामी सबैको प्रतिष्ठाको विषय बनिसकेकाले सबै मिलेर छिटो सञ्चालनमा ल्याउनुपर्नेमा उहाँको जोड छ । यसका लागि आँफूले जोडबलकासाथ लाग्ने मन्त्री गुरुङको भनाई छ ।

यसैगरी कृषि तथा वन विज्ञान विश्वविद्यालय रामपुरका डिन अर्जुनकुमार श्रेष्ठले कृषि कलेजलाई धेरैले सामान्यरुपमा हेर्ने गरेको पाइन्छ तर त्यस्तो नभएको बताउनुभयो । कृषि कलेज एवम् कृषि तथा वन विज्ञानको अध्ययन र क्षेत्र महान र विशाल रहेको उहाँको भनाई छ । २०७२/०७३ मा कृषि क्याम्पस सञ्चालन सम्बन्धी ऐन बनेसँगै नेपालका १३ स्थानमा कृषि कलेज स्थापना गर्ने नियम बनेको हो । सोहि अनुसार चापाकोटमा पनि सञ्चालन हुन लागेको उहाँले उल्लेख गर्नुभयो । त्यसैले विश्वविद्यालय कलेज खोल्न तयार रहेको उहाँले बताउनुभयो । कार्यक्रममा सर्वोच्च अदालतका माननीय न्यायाधिश तीलप्रसाद श्रेष्ठले कृषि कलेल सञ्चालनका लागि बजेट, दरवन्दी र पूर्वाधार मुख्य हुन्छ, यसको व्यवस्थापन भैसकेको उल्लेख गर्नुभयो । शिक्षाजस्तो क्षेत्रमा अरु काम जेसुकै होस् मेरो राजनीति विग्रनुहुँदैन या राम्रो हुनुपर्छ भनेर लाग्न हुँदैन । यो कलेज कुनै पार्टीको हुँदैन, चापाकोटवासीकासाथै देशकै कलेज हुने उहाँले बताउनुभयो ।

यस्तै गण्डकी प्रदेशका पूर्व सांसद भागवत प्रकाश मल्लले यहाँ बन्ने कृषि क्याम्पस चापाकोटवासीको मात्र नभएर समग्र जिल्लावासीकै गौरवको विषय भएको बताउनुभयो । यसका लागि जग्गाको व्यवस्थापन भैसकेको र आवस्यक थप जग्गाको लागिसमेत पहल भैरहेको उहाँले जानकारी दिनुभयो ।

कार्यक्रमको सूरुमा चापाकोट नगरपालिकाका नगर प्रमुख देवबहादुर खाँण ( इश्वर ) ले कार्यक्रमका बारेमा जानकारी गराउनु भएको थियो । जानकारीसँगै कृषि कलेज सञ्चालनका लागि नगरपालिकाले के के गर्नुपर्ने हो, सबै गर्न तयार रहेको व्यक्त गर्नुभएको छ ।