पाल्पा,१५ साउन- नदीजन्य पदार्थ चोरी निकासीमा पाल्पाको बगनासकाली गाउँपालिका वडा नम्बर ६ का वडा अध्यक्षलाई जरिवाना गरिएको छ । बगनासकाली गाउँपालिकाले ६ नम्बर वडाका वडाध्यक्ष लक्ष्मी प्रसाद अधिकारीलाई दुई लाख १० हजार जरिवाना गरेको हो ।

यम्घा दर्पुकको मचेटाघाटबाट अवैध रुपमा नदीजन्य पदार्थ चोरी निकासी गरेको भन्दै गाउँपालिकाले जरिवाना गर्ने निणर्य भएको गाउँपालिका अध्यक्ष सरस्वती चिदीले बताउनुभयो । वडाध्यक्ष अधिकारीलाई अवैध रुपमा बन्द रहेको घाटबाट ढुंगा, गिट्टी, बालुवा चोरी निकासी गरी ४२ टेक्टर नदीजन्य पदार्थ दर्पुक क्षेत्रको विभिन्न तीन स्थानमा डम्पीङ गरी राखेको पाइएकोले प्रतिटेक्टर ५ हजारका दरले हुन आउने रकम दुई लाख दश हजार रुपैयाँ जरिवाना गर्ने निणर्य भएको अध्यक्ष चिदीले बताउनुभयो ।

गाउँपालिकाले आर्थिक ऐन २०७९ को दफा नं. २५ अनुसार जरिवाना गर्ने निणर्य गरिएको जनाएको छ ।