पोखरा,८ साउन-नेकपा ( एमाले ) गण्डकी प्रदेश कमिटीले कास्की जिल्ला बाट प्रतिनिधित्व गर्ने प्रदेश सचिबालय सदस्य तथा सदस्यहरू संग अन्तरक्रीया बैठक सम्पन्न गरेको छ ।
बैठकमा नेकपा (एमाले) का सचिव एवं गण्डकी प्रदेश कमिटीका इन्चार्ज गोकर्ण बिष्टले नयाँ चुनौती र जिम्मेवारीलाई सामना गर्न यथार्थमा मैदानमा उत्रनु पर्ने भन्दै परिणाम निस्कने गरि पार्टी काममा लाग्न सबै प्रदेश कमिटीका सदस्यहरूलाई आग्रह गर्नुभएको थियो ।
पूर्वि मन्त्री समेत रहनुभएका सचिव बिष्टले एमाले सरकारका योजना र प्रदेश तथा स्थानीय तहका जनप्रतिनिधिहरूले गरेका कामको प्रभाबकारी प्रचार संगै सबै नेता तथा कार्यकर्ताहरू अनुशासित र इमान्दार व्यवहार हुनुपर्नेमा जोड दिनुभयो ।
संगठनात्मक अराजकता र स्वेच्छाचारीताले पार्टी सबल हुन नसक्ने बताउदै बिष्टले नेतृत्वदेखि कार्यकर्ता सम्म त्यसको अन्त्य अबको पहिलो शर्त हुने बताउनुभयो ।
अवशरका लागि मात्रै पार्टी खोज्ने प्रवृत्ति घातक भएको हुँदा निहित ब्यक्तिगत स्वार्थ केन्द्रीत हुने गरि काम नगरी देश र जनताको हितमा मात्रै केन्द्रित हुन आफ्नो पार्टीका निर्वाचित जन प्रतिनिधिहरूलाई सचिव बिष्टले आग्रह गर्नुभयो ।
उहाँले पार्टी प्रणालीमा चल्ने हुदा विधि र प्रक्रियाबाटै अनुशासन स्थापित गर्ने उद्घोष गर्नुभयो ।

कार्यक्रममा एमाले स्थायी कमिटी सदस्य एवं गण्डकी प्रदेशका पूर्व मुख्यमन्त्री खगराज अधिकारीले अब नेतृत्व होस वा कार्यकर्ता सच्चिनुको बिकल्प नभएको बताउनुभयो । पार्टीका विरुद्ध भएका अनर्गल प्रचारलाई परास्त गर्न प्रतिवाद गर्नुपर्ने बताउदै एक भएर लाग्न समेत कार्यक्रताहरुलाई आग्रह गर्नुभयो ।