वालिङ,१७ मङ्सिर- स्याङ्जा निर्वाचन क्षेत्र नमवर २ बाट प्रतिनिधि सभा सदस्यमा नेपाली कांग्रेसका उपसभापति धनराज गुरुङ निर्वाचित हुनुभएकाे छ।
गुरुङले नेकपा एमाले सचिव पद्मा अर्याललाई ५ हजार ६ सय २७ मतले पछि पार्दै प्रतिनिधि सभा सदस्यमा निर्वाचित हुनुभएकाे हाे। गुरुङले ३१ हजार ४ सय ६६ मत प्राप्त गर्नु भएकाे छ भने अर्यालले २५ हजार ८ सय ३९ मत प्राप्त गर्नुभएकाे छ। राष्ट्रिय स्वतन्त्र पार्टीका टिकराज गुरुङले ८ हजार १ सय १३ मत प्राप्त गर्नुभएकाे छ।

यसै गरि प्रदेश सभा २ मा नेपाली कांग्रेसका महेश भट्टराई निर्वाचित हुनुभएकाे छ। नेकपा एमालेका डा. बुद्धिमान श्रेष्ठलाई १ हजार ७ सय ८६ मतले पछि पार्दै भट्टराई प्रदेश सभा सदस्यमा निर्वाचित हुनुभएकाे हाे। भट्टराईले १८ हजार ७ सय ८८ मत प्राप्त गर्नुभएकाे छ भने श्रेष्ठले १७ हजार २ मत प्राप्त गर्नुभएकाे छ। निर्वाचन क्षेत्र नम्बर २ मा ७० हजार १ सय ९१ मत खसेकाे थियाे। मङ्सिर ४ गते निर्वाचन सम्पन्न भएपनि चापाकाेट नगरपालिकामा नेपाली कांग्रेसले बुथ कब्जा गरि अनधिकृत रुपमा मतदान गरेकाे भन्दै गठबन्धन बाहेकका दलहरु नेकपा एमाले, राष्ट्रिय स्वतन्त्र पार्टी, राप्रपा लगायतका दलहरु र स्वतन्त्र उम्मेदवारले निर्वाचन आयाेगमा उजुरी दिएपछि मतगणना हुन सकेकाे थिएन। निर्वाचन आयाेगले मतगणना गर्ने निर्णय गरेपछि मात्र मतगणना सुरु भएकाे थियाे।