वालिङ,२० असोज– मंगलबारदेखिपरेको अविरल वर्षासंगै पहिरो जादा वालिङ नगरपालिका वडा नम्बर १३ को बायँटारीमा ५ घर जोखिममा परेका छन् ।

अविरल वर्षासंगै पहिरो जादा बायँटारीका ५ पक्की घरअगाडि पहिरो खस्दा ती घरहरु उच्च जोखिममा परेका हुन् । वालिङ नगरपालिका १३ का वडा अध्यक्ष नमलाल डुम्रेले बायँटारीका धनबहादुर डाला, पृथलाल गुरुङ, हाइमाया गुरुङ र इन्द्रबहादुर सार्कीलगायतको घरअगाडि पहिरो जाँदा घरहरु जोखिममा परेको बताउनुभयो ।

जोखिममा रहेका घरका परिवारलाई अन्त्र स्थानान्तरण गरिएको छ । जोखिममा रहेका पध्ये तीन घर परिवारलाई मगर भवनमा सारिएको छ भने दुई घर आफन्तको घरमा बसेको अध्यक्ष डुम्रेले जानकारी दिनुभयो । घरमा रहेका सम्पुर्ण सामानहरु समेत सारिएको छ । तत्काललाई वर्षाबाट जोखिम कम गर्नका लागि प्लाष्टिकले पानी तर्काउने काम गरिएको छ ।

घर अगाडी पहिरो गएको खबर पाए लगतै वालिङ नगरपालिकाका नगरप्रमुख कृष्ण खाँण, वडा अध्यक्ष नमलाल डुम्रे समेत घटनास्थल पुगेर तृपाल लगायतका सामग्री पहिरो गएको स्थानमा राखेर थप पहिरो जानबाट रोकनको लागि पहल गर्नुभएको थियो ।

नगरपालिकाले तत्काल पहिलो रोकथामका लागि प्लाष्टिकहरु उपलब्ध गराएको छ भने शसस्त्र र जनपथको सहयोगमा प्लाष्टिकहरु बिछ्याईएको छ । वर्षा निरन्तर भएका कारण सचेत रहन आग्रह गर्दै कहिँ कतै जोखिम अवस्था सृजना भएमा सम्बन्धीत वडा तथा नगरपालिकामा सूचना गरी सुरक्षित रहन नगरप्रमुख खाँणले आग्रह गर्नुभएको छ ।