वालिङ,१९ भदौ– गल्याङ नगरपालिकाका नगरप्रमुख गुरुप्रसाद भट्टराईले समग्र नगरको विकासका लागि एकजुट भएर अगाडि बढ्न सम्पूर्ण नगरबासीमा आग्रह गर्नुभएको छ ।

नगरपालिकाको आर्थिक वर्ष २०७८÷०७९को समीक्षा कार्यक्रमलाई सम्बोधन गर्दै नगरप्रमुख भट्टराईले सो कुरा बताउनुभएको हो । नगरप्रमुख भट्टराईले भन्नुभयो, “स्थानीय स्रोत र साधनको अधिकतम प्रयोग गरेर गरको विकासमा लाग्नुपर्छ तब मात्रै नगरको विकास हुन्छ । यो अभियानमा सबै सहभागि बनौ ।” जनप्रनिधिहरुका साथै कर्मचारी एक भएर नगरको विकासका लागि ठोस संकलपका साथ अगाडि बढ्नुपर्ने नगरप्रमुख भट्टराईको भनाइ थियो ।

कार्यक्रममा नगरउपप्रमुख हेमा न्यौपानेले कार्यक्रमको प्रभावकारीताका पक्षमा ध्यान दिन र सेवा प्रवाहमा जिम्मेबार भएर लाग्न आग्रह गर्नु भयो । नगरपालिको वडा नम्बर १ देखि ११ नम्बर वडाका वडा सचिवहरुलो आआफ्नो वडामा भएका समस्याका बारेमा आफ्नो भनाइ राख्नुभएको थियो ।

नगरपालिकाका प्रमुख प्रशासकीय अधिकृत दामोदर शर्माले गल्याङ नगरपालिका भित्रका समस्याहरुको बारेमा आफू जानकार भएको र असोज महिना भित्रमा समस्याको समाधान गर्ने गरी आफू लागेको बताउनुभयो । कार्यक्रममा नगरपालिकामा रहेका विभिन्न साखाहरुले आ–आफ्ना प्रगति प्रतिवेदनहरु प्रस्तुत गरेका थिए ।