वालिङ,६ साउन– प्रजातान्त्रिक विचार समाज स्याङ्जाले ४०औँ विपि स्मृति दिवसका अवसरमा विचार गोष्ठी सम्पन्न गरेको छ । वालिङमा सम्पन्न विचार गोष्ठीमा प्रजातान्त्रिक विचार समाजका केन्द्रिय अध्यक्ष डा.केदारनर सहिं केसीले विपिले प्रतिपादन गर्नुभएको सिद्धान्त र विचारलाई आत्मसाथ गरी लोकतान्त्रिक सुदृढिकरणमा लाग्नुपर्नेमा जोड दिनुभयो । महामानव विपि कोइरालाको मेलमिलाप नीतिलाई अवलम्बन गर्दै जनतालाई केन्द्रमा राखेर, जनतालाई साँचो अर्थमा सार्वभौम बनाउने काममा विपिको योगदान अतुलनीय रहेको बताउनुभयो ।

कार्यक्रममा नेपाली कांग्रेस जिल्ला सभापति राजु थापाले विपिले प्रतिपादन गर्नुभएका सिद्धान्तलाई आत्मसाथ गरी लोकतन्त्रको संस्थागत विकास गरी देशलाई निकास दिन कांगे्रस कटिबद्ध हुनुपर्ने बताउनुभयो । कार्यक्रममा सभापति थापाले नेपाली कांगे्रसको संगठन सुदृढिकरणका बारेमा आफ्ना भनाई राख्नुभएको थियो भने प्राध्यापक कृष्ण खनालले जसको विचार हो उसैको शासन गर्नुपर्दछ भन्ने शीर्षक र प्रजातान्त्रिक समाजका केन्द्रिय सचिव डा बासुदेव भण्डारीले विपिको साहित्यिक यात्राका बारेमा जानकारी गराउनुभएको थियो ।
यसै गरी विपिको स्मृतिमा वृक्षारोपण
४०औँ बिपि स्मृति दिवसका अवसरमा भीरकोटमा वृक्षारोपण गरिएको छ । नेपाली कांग्रेस भीरकोट नगरसमिति द्वारा आयोजित वृक्षारोपण कार्यक्रम भीरकोट ५ सुन्दर बजार, स्वरेक भञ्याङ र पर्यटकीय स्थान मैदानमा गरिएको हो ।
कार्यक्रमभमा पूर्व सांसद तथा नेपाली कांगे्रस पूर्व जिल्ला सभापति खगेन्द्रराज रेग्मीले विपि महान राजनितिज्ञ तथा स्वातन्त्रता प्रेमी रहुनभएको भन्दै उहाँले जीवनभर स्वतन्त्रताका लागि धेरै संर्घष र त्याग गर्नुभएको बताउनुभयो । साथै उहाँ बहुमुखी प्रतिभावान व्यक्तित्व रहनुभएको भन्दै उहाँले साहित्य क्षेत्रलाई समेत ठुलो योगदान दिनुभएको भन्दै विपिको राष्ट्रियता र एकताको सिद्धान्तलाई अहिलेको राजनीतिले अंगाल्नुपर्ने बताउनुभयो ।

विपि तरुणहरुको संरक्षक समेत रहनुभएकाले सँधै युवाहरुलाई प्रेरणा दिएर देशका लागि अगाडि बढ्न अभिपे्ररित गर्ने व्यक्तित्व समेत रहनुभएको बताउनुभयो ।
कार्यक्रममा कम्युनिष्टले समेत विपिको विचार अंगाल्न खोजेको भन्दै प्रजातन्त्रको मुल्य र मान्यतालाई आत्मसाथ गर्दै अहिले पनि विपिको विचार उत्तिकै सान्र्दभिक रहेको बताउनुभयो ।
बगरेबजार, भञ्याङ र मैदानमा कपुर, कल्कि, ग्लोमरलगायतका १५० विरुवा रोपण गरिएको नगर सभापति यामप्रसाद अधिकारी लक्ष्मणले जानकारी दिनुभयो । त्यस्तै विपि स्मृति दिवसका अवसरमा वालिङ ५ समा समेत बृक्षारोपण गरिएको छ भने अन्य स्थानहरुमा समेत विभिन्न कार्यक्रम सम्पन्न भएका छन् ।