गह्रौ प्राथमिक अस्पताल वालिङमा सिएस सेवाको सञ्चालनमा ल्याउने

वालिङ, ९ जेठ– वालिङ नगरपालिकाका नवनिर्वाचित प्रमुख र उपप्रमुखले सोमबार पदभार ग्रहण गर्नुभएको छ । सोमबार पुजाआजा सहित नगरप्रमुख कृष्ण खाँण र उपप्रमुख कविता तिवारीले पदभार ग्रहण गर्नुभएको हो ।

पदभार ग्रहण संगै प्रमुख कृष्ण खाँणले गह्रौ प्राथमिक अस्पताल वालिङमा एक वर्ष भित्र सिएस अर्थात सिजारियान् सेक्सन सेवाको स्थापना गर्ने र ग्रामिण दुई सडकको तत्काल स्तारोन्नति गर्ने निर्णय गर्नुभएको छ । पदभार ग्रहण संगै नगरप्रमुख खाँणले दुई निर्णयमा हस्ताक्षर गर्नुभएको हो । सिएस सेवा भनेको नर्मल डेलिभरी हुन नसकेका महिलाहरुका लागि अपरेशन गरी बच्चा जन्माउने सेवा हो ।

वालिङका नागरिक डेलिभरी सेवाका लागि जिल्ला अस्पताल स्याङ्जा, पाल्पा र पोखराका विभिन्न अस्पताल धाउनुपर्ने बाध्य छ् । सिएस सेवासंगै दुई जिल्लाका महिलाहरु लाभान्वित हुनेछन ।

पर्वतका केही पालिका र जिल्लाका गर्भवती महिलाहरु लाभान्वित हुनेछन । यस्तै वालिङ १२ डाँडाखर्क र वालिङ १४ अर्खलबासको ग्रामीण सडक स्तरोन्नति गरिने निर्णय गरिएको छ । उक्त दुई ग्रामिण सडकखण्ड स्तरोन्नति गरी थप दुर्घटनाको जोखिमलाई हटाउन यस्तो निर्णय गरिएको नगरप्रमुख खांणले बताउनुभयो । डाँडाखर्कमा गत बैशाख ४ गते जीप दुर्घटना हुँदा ६ जनाले ज्यान गुमाएका थिए भने ४ जना घाइते भएका थिए । दुर्घटनामा सात महिना बच्चा र आमाको मृत्यु भएको थियो ।

यसैगरी ३० गते निर्वाचनका दिन मतदाताबोकेको जीप अर्खलबासमा दुर्घटना हुँदा एक गर्भवती सहित १४ जनाको मृत्यु भएको थियो । उक्त दुर्घटना ९ जना घाइते भएका थिए । घाइतेहरुको उपचार भैरहेको छ ।