वालिङ,१२ वैशाख– यही वैशाख ३० गते हुने स्थानीय तहको निर्वाचनको लागि उम्मेदवारी मनोनयनको अन्तिम दिन आज नेकपा एमालेले गल्याङ नगरपालिका स्थित निर्वाचन अधिकृतको कार्यालयमा पुगेर उम्मेदवारी दर्ता गरेको छ ।

गल्याङ नगरपालिकाको नगरप्रमुखको लागि सूर्य प्रसाद गैरे (पारसले) उम्मेदवारी दर्ता गराउनुभएको छ भने उपप्रमुखको लागि देवि थापाले उम्मेदवारी दर्ता गराएको नेकपा एमाले गल्याङ नगर कमिटीले जनाएको छ । नगरप्रमुखका उम्मेदवार गैरे सहित उपप्रमुख, वडा अध्यक्ष र सदस्यका उम्मेदवारहरु निर्वाचन अधिकृतको कार्यालयमा पुगरेर उम्मेदवारी दर्ता गराएको एमालेले जनाएको छ । उम्मेदवारी दर्ताको लागि एमाले कार्यकर्ताहरु नाराजुलुस सहित निर्वाचन कार्यालय पुगेका थिए ।

उम्मेदवारी दर्ता गराए संगै नगरप्रमुखका उम्मेदवार सूर्य प्रसाद गैरे (पारसले) गल्याङ नगरपालिकाका जनताको विकास र समृद्धिको लागि आफुले उम्मेदवारी दिएको बताउनुभयो । नगरप्रमुखका उम्मेदवार गैरेले आफ्नो टिमलाई वैशाख ३० गते हुने निर्वाचनमा मतदान गरी अध्याधिक बहुमतका साथ विजयी गराउन आग्रह समेत गर्नुभयो । नेकपा एमालेका जिल्ला कमिटीका अध्यक्ष समेत रहनुभएका युवा नेता गैरेले जनताको मतलाई सहिरुपमा सदुपयोग गर्ने बताउदै नेकपा एमालेका उम्मेदवारहरुलाई गल्याङमा मात्रै नभएर जिल्ला भरका सबै पालिकामा विजयी गराउन नुरोध गर्नुभयो ।