वालिङ,१२ वैशाख– यही वैशाख ३० गते हुने स्थानीय तहको निर्वाचनको लागि उम्मेदवारी मनोनयनको अन्तिम दिन आज नेकपा एमालेले चापाकोट नगरपालिका स्थित निर्वाचन अधिकृतको कार्यालयमा पुगेर उम्मेदवारी दर्ता गरेको छ ।

चापाकोट नगरपालिकाको नगरप्रमुखको लागि राजु कोइरालाले उम्मेदवारी दर्ता गराउनुभएको छ भने उपप्रमुखको लागि सृष्टि मल्लले उम्मेदवारी दर्ता गराएको नेकपा एमाले चपाकोट नगर कमिटीले जनाएको छ । नगरप्रमुखका उम्मेदवार कोइराला सहित वडा अध्यक्ष र सदस्यका उम्मेदवारहरु निर्वाचन अधिकृतको कार्यालयमा पुगरेर उम्मेदवारी दर्ता गराएको एमालेले जनाएको छ । उम्मेदवारी दर्ताको लागि एमाले कार्यकर्ताहरु नाराजुलुस सहित निर्वाचन कार्यालय पुगेका थिए ।

उम्मेदवारी दर्ता गराए संगै नगरप्रमुखका उम्मेदवार राजु कोइरालाले सम्रग चापाकोटको विकासको लागि आफुले उम्मेदवारी दिएको बताउदै आफ्नो टिमलाई वैशाख ३० गते हुने निर्वाचनमा मतदान गरेर सहयोग गर्न समेत आग्रह गर्नुभयो । एमाले चापाकोट नगरकमिटीका अध्यक्ष समेत रहनुभएका कोइराला युवाहरुको माझ निकै लोकप्रिय रहेका छन् ।