वालिङ,२० माघ– आँधिखोला बहुप्राविधिक शिक्षालय वालिङ १३ मा कार्यरत प्रशासकीय सहायक दयाराम डुम्रेको निधन प्रति दुःख व्याक्त गर्दै शिक्षालयमा श्रद्धाञ्जली सभा गरिएको छ । वालिङ नगरपालिका १३ कटौजे निवासी डुम्रेको ३२ वर्षको उमेरमा काठमाडौंमा उपचारका क्रममा मंगलबार निधन भएको थियो ।
डुम्रेको निधन प्रति दुःख व्याक्त गर्दै शिक्षालयले आज (बिहीबार) शिक्षालयमा शोक सभाको आयोजना गरेर डुम्रे प्रति श्रद्धाञ्जली व्याक्त गरेको हो । शोक सभामा शिक्षालयका प्रमुखका साथै शिक्षालयमा कार्यरत कर्मचारी र अध्ययनरत विद्यार्थीहरुको उपस्थिती रहेको थियो ।
स्थापना काल देखि नै शिक्षालयमा प्रशासकीय सहायकको रुपमा कार्यरत डुम्रेको निधनले शिक्षालयमा अपुरणीय क्षती पुगेको शिक्षालयले जनाएको छ । मृतक डुम्रेको श्रीमती एक छोरी बुबा आमा दुई बहिनी र एक भाइ रहेका छन् । विगत केही वर्ष देखि मृगौला रोगबाट ग्रसित डुम्रेको काठमाडौंमा उपचारकै क्रममा मंगलबार मृत्यु भएपछि बुधबार राम्दीमा दाहा संस्कार गरिएको थियो ।