गल्याङ,१६ कात्तिक– गल्याङ नगरपालिका १ मालुङ्गामा सञ्चालित तालीम सम्पन्न भएको छ । गत साउन ४ गतेदेखि सुरु भएको सिलाई कटाई तथा पार्लर तालीमको आज मंगलबार समापन गरिएको हो ।

तालीम समापनको अवसरमा बोल्दै गल्याङ नगरपालिका प्रमुख भुपराज अधिकारीले स्वरोजगार र उद्यमी बन्नका लागि नगरपालिकाले सबै खालको सहयोग गर्ने बताउनुभयो । उहाँले कुनै पनि तालीम लिए पछि त्यसको सदुपयोग हुनुपर्नेमा जोड दिदै यस तालीमबाट आत्मनिर्भर र उद्यमी बन्न सहयोग पुग्ने विश्वास समेत व्यक्त गर्नुभयो ।

नगरप्रमुख अधिकारीले भन्नुभयो, ‘उद्यमी बनेर अगाडि बढ्नुहोस्, नगरपालिकाले बजारको ग्यारेण्टी गर्छ ।’ महिलाहरुले तालीम लिएर आत्मनिर्भर बन्न सकेमा घरेलु हिंसा समेत कमी हुने नगप्रमुख अधिकारीको भनाइ थियो । बैंक तथा वित्तीय संस्थाले व्याजमा सस्तो गरी उद्यमीलाई प्रोत्साहन गर्नुपर्नेमा जोड दिदै नगरप्रमुख अधिकारीले सस्तो ऋणका लागि पनि आफुले सबै सहयोग गर्ने प्रतिबद्वता जनाउनुभयो ।महिला, असक्त र विपन्न परिवारका लागि आफु सधैं सहयोगी बनेको भन्दै उहाँले त्यसमा आवश्यकता अनुसार सहयोग गर्ने बताउनुभयो ।

कार्यक्रममा गल्याङ नगरपालिका प्रमुख प्रशासकीय अधिकृत दामोदर शर्माले तालीमको सही सदुपयोग गर्न आग्रह गर्नुभयो । उहाँले तालीम लिएर घरमा बसेमा सरकारको लगानी बालुवामा पानी बराबर हुने भन्दै यसलाई सही रुपमा सदुपयोग गर्न प्रशिक्षार्थीहरुलाई आग्रह गर्नुभयो ।
कार्यक्रमको अध्यक्षता गर्नुभएका गल्याङ नगरपालिका आर्थिक विकास शाखा सुशिल अर्यालले तालीम प्राप्त गर्नु नै अवसर भएको भन्दै यसलाई अब व्यवहारमा लैजान आग्रह गर्नुभयो ।
कार्यक्रममा गल्याङ नगरपालिका १ का वडाअध्यक्ष तथा नगरप्रबक्ता गणेशप्रसाद बस्याल, वडा नम्बर २ का अध्यक्ष इबप्रसाद कर्माचार्य लगायतले बोल्नुभएको थियो ।