वालिङ,२२ असोज– नेपाली कांग्रेस भीरकोट नगरपालिकाको पदस्थापन तथा शुभकामना आदानप्रदान कार्यक्रम सम्पन्न भएको छ । हालै सम्पन्न १४औँ महाधिवेसन अन्र्तगत भीरकोटमा नवनिर्वाचित समितिको पदस्थापन एवं विजयादशमी तथा दिपावलीको अवसरमा शुभकामना आदानप्रदान कार्यक्रम गरिएको हो ।
कार्यक्रमलाई सम्बोधन गर्नुहुँदै नेपाली कांग्रेसका केन्द्रिय सदस्य तथा संविधान सभा सदस्य धनराज गुरुङले बाटो विराएर गएकाहरुको कुनै अस्तित्व नरहेकाले पार्टीभित्र इमान्दर भई काम गर्न कार्यकर्ताहरुलाई आग्रह गर्नुभयो । उहाँले नेपाली कांग्रेस पार्टीमा अहिले कुनै एजेण्डा नरहेकाले एजेण्डा सहित जनतामाँझ गएमा कांग्रेस पार्टी जनमुखी हुने विश्वास व्यक्त गर्नुभयो । गुरुङले आँफूले केन्द्रिय महामन्त्रीमा उम्मेदवारी घोषणा गरेकाले सहयोग गर्न आग्रह गर्दै पद पाउनु ठुलो नभएकाले कार्य निर्वाह गर्नु मुख्य उपलब्धी रहेको बताउनुभयो ।