गल्याङ,२० असार– गल्याङ नगरपालिका ६ पिडिखोलाका कृषकलाई बाख्रा र घाँसको बिउ वितरण गरिएको छ । नगरपालिकाले पिडिखोलाका ८० परिवारलाई बाख्रा तथा घाँसको बिउ वितरण गरेको होे ।
नगरपालिका भित्र रहेका किसानहरुलाई कृषिमा आत्मनिर्भर बनाउने उद्देश्यले नगरपालिकाले उन्नत जातका बोका बाख्रा वितरण गरेको हो ।
बाख्रा बितरण कार्यक्रममा वडाध्यक्ष टिकाराम भुसालले किसानहरुलाई आत्मनिभर र व्यवसायिक बनाउन सहयोग पुग्ने बताउनुभयो । उहाँले कृषि र पशुको क्षेत्रमा नगरपालिकाले विभिन्न योजनाहरु ल्याएको भन्दै त्यसको सदुपयोग गर्न आग्रह गर्नुभयो ।

कार्यक्रममा गल्याङ नगरपालिका पशु शाखा प्रमुख सुशिल अर्यालले खरी तथा बोयर जातका बोका वितरण गरिएको जानकारी दिनुभयो । उहाँले उन्नत जातका बोकाबाट व्यवसायीक रुपमा अगाडी बढ्न सहयोग पुग्ने बताउनुभयो । अर्यालले बाख्राका लागि आवश्यक घाँस पनि सँगै वितरण गरी दानाको खपत कम गर्ने लक्ष राखिएको बताउनुभयो ।
सो अवसरमा सुपर नेपियर, मोलाटो, गवाटेमाला, बदामे, राइखनियो लगायतका घाँसका बिउ वितरण गरिएको छ । पिडिखोला कृषि सहकारी संस्था लिमिटेडका अध्यक्ष देविलाल पाण्डेले प्राप्त बोका र घाँसको सदुपयोग गर्न आग्रह गर्नुभयो ।