गोरखा,२८ जेठ– श्रीमतीको हत्या गरी तन्नामा पोको पारेर मस्र्याङदी नदीमा फालेको आरोपमा प्रहरीले शुक्रबार एक षुरुषलाई पक्राउ गरेको छ । पालुङाटार नगरपालिका ७ च्याङ्लीका ४४ वर्षीय रामबहादुर कामीलाई आफ्नै श्रीमतीको हत्या गरेर मस्र्याङदी नदीमा फालेको आरोपमा पक्राउ गरिएको जिल्ला प्रहरी कार्यालय गोरखाका प्रहरी नायव उपरीक्षक प्रकाश दाहालले जानकारी दिनुभयो ।

कामीले शुक्रबार बिहान २४ वर्षीया श्रीमती सम्झना रेग्मीलाई गोरखा र तनहुँ जोड्ने नयाँपुलस्थित झोलुङ्गे पुलबाट फालेको देखेपछि स्थानीयवासीले प्रहरीलाई जानकारी गराएका थिए । पक्राउ परेका कामीले श्रीमतीको गए राति नै मृत्यु भएकाले दाहसंस्कार गर्न एक्लैले सम्भव नभएपछि तन्नामा पोको पारेर नदीमा फालेको स्वीकार गरेको र शवको खोजीकार्य भइरहेको प्रहरीले जनाएको छ ।