काठमाडौं,१० जेठ– स्वास्थ्यमन्त्री हृदयेश त्रिपाठीले कोभिड(१९ विरुद्धको खोप खरिदका लागि अमेरिका, बेलायत, रुस, भारत र चीनसँग उच्चस्तरिय पहल गरिएको बताउनुभएको छ । स्वास्थ्य तथा जनसंख्या मन्त्रालयले शुक्रबार आयोजना गरेको भर्चुअल पत्रकार सम्मेलनमा मन्त्री त्रिपाठीले खोप आपूर्तिका लागि ती मुलुकलाई पत्राचार समेत गरिएको बताउनुभयो ।

नर्वेमा स्टकमा रहेको खोप ल्याउनका लागि शुक्रबार आफूले नर्वेली राजदूतसँग कुरा गरेको र नर्वेले सकारात्मक जवाफ दिएको मन्त्री त्रिपाठीले जानकारी दिनुभयो । मित्रराष्ट्रबाट अहिलेसम्म दुई अर्ब बराबरको स्वास्थ्य सामग्री नेपालले प्राप्त गरेको जानकारी दिँदै मन्त्री त्रिपाठीले थप मुलुकहरुले स्वास्थ्य सहायता उपलब्ध गराउन चाहेको बताउनुभयो । नेपाल प्रवेश गर्ने १४ वटा मुख्य नाकामा एन्टीजेन परीक्षण र स्क्रिन टेस्ट गर्ने हेल्थ डेस्क स्थापना गरिएको समेत मन्त्री त्रिपाठीले जानकारी दिनुभयो ।

स्वास्थ्य संकटकालको सुझाव सकारात्मक

मन्त्री त्रिपाठीले स्वास्थ्य संकटकाल लगाउन विज्ञहरुले दिएको सुझावलाई सकारात्मक रुपमालिएको बताउनुभयो । राष्ट्रपति कार्यालयले कोभिड(१९ संकट व्यवस्थापन अध्यादेश ल्याएको छ, जसमा स्वास्थ्य संकटकाल लगाउन सकिनेदेखि युनिफाइड अस्पताल स्थापनासम्मका प्रावधान समेटिएको पनि मन्त्री त्रिपाठीले जानकारी दिनुयभो ।
काठमाडौं जिल्ला प्रशासनले अध्यादेशमा उल्लेख भएका प्रावधानलाई कार्यान्वयन गर्दै निषेधाज्ञालाई कडाइ गर्ने थप आदेश सार्वजनिक गरिसकेको छ ।