वालिङ,१३ वैशाख– वालिङ नगरपालिकाले कृषकहरुलाई अनुदानमा हाते ट्रयाक्टर वितरण गरेको छ । नगरपालिकाले कृषक समूह, सहकारी तथा ब्यावसायिक फर्महरुलाई ५० प्रतिशत अनुदानमा ४९ ओटा हाते ट्रयाक्टर बितरण गरिएको नगर उपप्रमुख कल्पना तिवारीले बताउनुभयो ।

परम्परागतरुपमा कृषि प्रणाली अवलम्वन गर्दा उत्पादनभन्दा लागत धेरै लाग्ने र झण्झटिलो हुने भएकाले कृषकहरुलाई आधुनिक प्रविधि तथा यान्त्रिकीकरणको प्रयोग गरी सहज रुपमा कृषि कार्य गर्न सहयोग पुर्याउने उद्देश्यले हाते ट्रयाक्टर वितरण गरिएको उपप्रमुख तिवारीले बताउनुभयो ।
“पछिल्लो समय खेतबारी जोत्नका लागि गोरु पाउन समस्या भएको अवस्थामा हाते ट्रयाक्टरहरु बढी उपयोगी हुने ठानेर हाते ट्रयाक्टर वितरण गरेका हौं” उपप्रमुख तिवारीले भन्नुभयो, “यसको सही सदुपयोग गर्न र गाउँघरमा आलोपालो ब्यवस्थित तरिकाले सञ्चालन हुनेमा विश्वस्त छु ।”

गत आर्थिक वर्ष २०७६÷०७७ मा नगरपालिकाले सूचना निकालेको र सोही सूचनाका आधारमा आवेदन परेका कृषक समूहहरुको अनुगमनपछि छनोट गरी वितरण गरिएको कृषि अधिकृत सुभासचन्द्र अर्यालले बताउनुभयो ।
नगरपालिकाले ६ हर्ष पावरको प्रति हाते ट्रयाक्टर रु. ६० हजार र ७ हर्ष पावरको प्रति हाते ट्रयाक्टर रु. ६५ हजारमा खरिद गरिएको अधिकृत अर्यालले बताउनुभयो ।
कृषकहरुको माग र आवश्यकताका आधारमा ट्रयाक्टर खरिद गरी वितरण गरिएको हो । कृषिमा आधुनिक प्रविधिको प्रयोगले कृषि उत्पादन बृद्धि गर्नुकासाथै छिटो, छरितो र सहजसमेत हुने भएकाले कृषकहरु पछिल्लो समय प्रविधितर्फ आकर्षित हुँदै गएकाले हाते ट्रयाक्टर वितरण गरिएको कृषि शाखाका प्राविधिक केशबहादुर थापाले बताउनुभयो ।
किसानलाई ६ हर्ष पावरको प्रति हाते ट्रयाक्टर रु. ३० हजार र ७ हर्ष पावरको प्रति हाते ट्रयाक्टर रु. ३२ हजार ५०० मा उपलब्ध गराईएको हो ।
हाते ट्रयाक्टर वितरण पूर्व कृषकहरुलाई सञ्चालन गर्नेसम्बन्धी अभिमुखीकरण दिईएको थियो ।