काठमाडौं,२५ माघ–सरकारले सोमबारदेखि दोस्रो चरणको कोभिड(१९ विरुद्धको खोप अभियान शुरु गर्ने भएको छ । दोस्रो चरणमा पत्रकार, दुतावास, युएन एजेन्सीका कर्मचारीहरुलाई प्राथमिकतामा राखेर खोप लगाइने भएको छ ।
सञ्चारमन्त्री पार्वत गुरुङले बानेश्वरस्थित निजामति कर्मचारी अस्पतालमा पत्रकारलाई खोप लगाउने व्यवस्था गरिएको बताउनुभयो । सरकारले १३ हजारभन्दा बढी पत्रकारलाई खोप लगाउने तयारी गरेको छ ।
सूचना विभागको प्रेसपासको आधारमा सरकारले खोप लगाउने पत्रकारको विवरण तयार पारेको हो । राजधानीमा आइतबार आयोजित कार्यक्रममा मन्त्री गुरुङले स्वास्थ्य मन्त्रालयसँग सहकाय गरेर पत्रकारलाई खोपको व्यवस्था गरिने बताउनुभयो ।
मन्त्री गुरुङले कोरोना प्रभावित पत्रकारका लागि राहतको व्यवस्था गर्न सरकारले तयारी गरिरहेको समेत जानकारी दिनुभयो । शनिबार सकिएको खोप अभियानको पहिलो चरणमा १ लाख ८१ हजार ८ सय ५७ जनालाई खोप लगाइएको छ ।
सिभिल अस्पतालमा पत्रकार र पाटन अस्पतालमा यूएन एजेन्सीमा कार्यरत तथा विदेशी कर्मचारीलाई खोप लगाइने भएको छ ।