सिर्जना घिमिरे
रामपुर,५ भदौ– रामपुर नगरपालिका ३ बोहोरीडाँडामा शहिद स्मृती पार्कको आज (आइतबार) उद्घाटन गरिएको छ ।

सानिअमराई सामुदायिक बन क्षेत्रमा डिभिजन बन कार्यालय पाल्पा र रामपुर सव डिभिजन बन कार्यालयको व्यवस्थापनमा निर्माण गरिएको पार्कको प्रतिनिधी सभासदस्य तथा पूर्व भुमिसुधार मन्त्री दलबहादुर रानाले उद्घाटन गर्नुभएको हो । पार्कको उद्घाटन गर्दै पूर्व मन्त्री रानाले शहिदहरुको सम्मान र सम्झनाका लागि निर्माण गरिएको पार्कले रामपुरको पर्यटकीय क्षेत्रमा थप सहयोग पुर्याउने बताउनुभयो ।

पार्कलाई अझै व्यवस्थित बनाउनाउनुका साथै अन्य संरचनाहरु थप गर्दै जानुपर्नेमा उहाँले जोड दिनुभयो । आफूले सोचेभन्दा फरक पार्क बनाउन सहयोग गर्ने डिभिजन वन कार्यालय पाल्पालाई धन्यवाद दिनुभयो ।

कार्यक्रममा डिभिजन बन कार्यालय पाल्पाका डिभिजन बन अधिकृत दिपक ज्ञवालीले सामुदायिक बनको संरक्षणसँगै बनक्षेत्रको सौन्दर्यले पर्यटन विकासमा टेवा पुग्ने बताउनुभयो । सामुदायिक बनको विकास, पर्यटनसँग जोड्न सके आम्दानी समेत लिन सकिने अधिकृत ज्ञवालीको भनाइ थियो ।

कार्यक्रममा सामुदायिक बन उपभोक्ता महासंघका केन्द्रिय सदस्य कृष्णप्रसाद श्रेष्ठ, रामपुर नगरपालिका वडा नम्बर ३ का वडा अध्यक्ष दामोदर पाठक लगायतले बोल्नुभएको थियो । १४ लाख ४२ हजार केन्द्रीय बजेट तथा स्थानीयको रु १ लाख ४५ हजार बराबरको जनश्रमदान गरि करिब १५ लाख ८७ हजार रुपैयाको लागतमा पार्क निर्माण गरिएको निर्माण समितिका अध्यक्ष सूर्यनारायण श्रेष्ठले जानकारी दिनुभयो ।

कार्यक्रममा सहभागी पाहुनालाई स्थानीय बासिन्दाले पञ्चेबाजाले स्वागत गरेका थिए ।