वालिङ,२२ साउन– जिल्ला प्रहरी कार्यालय स्याङ्जाले बच्चालाई शौचालयको खाल्डोमा फालेर हत्या गरेको आरोपमा दुई जनालाई पक्राउ गरेको छ ।
गल्याङ नगरपालिका २ इलुङगाकी २२ लक्ष्मी रानाले आफ्नै ६ महिनाकी छोरीलाई शौचालयमा फालेर हत्या गरेको आरोपमा प्रहरीले बच्चाकी आमा २२ लक्ष्मी राना र पाल्पाको रामपुर नगरपालिका १० कुमाल गाउँका २२ वर्षीय केदार कुमाललाई पक्राउ गरेको हो ।

यही साउन १० गते घरमा कसैलाई नसोधी आफ्नो ६ महिनाकी छोरी सहित सम्पर्क विहिन भएकी राना र कुमाललाई प्रहरीले गल्याङ बजारबाट नियन्त्रणमा लिएको जिल्ला प्रहरी कार्यालयका प्रहरी नायब उपरिक्षक रविन्द्र खनालले जानकारी दिनुभयो ।
बुहारी सम्पर्क विहिन भएको र पाल्पाका केदार कुमालसंग भागि विवाह गरेको भन्ने आफुले सुचना पाएको भन्दै लक्ष्मीका ससुराले खोजतलास गरिदिन भन्दै प्रहरीलाई खबर गरेपछि प्रहरीले खोजतलास गर्ने क्रममा यही साउन २० गते शनिबार प्रहरीले राना र कुमाललार्ई गल्याङ बजारबाट नियन्त्तणमा लिएर थप अनुसन्धान कार्य अगाडी बढाएको छ ।

अनुसन्धानका क्रममा ६ महिनाकी छोरीलाई १० गते राति लक्ष्मी रानाले आफ्नै अस्थाई शौचालयको खाल्डोमा फालेको र खाल्डोमा सडेको अवस्थामा बच्चाको शब भेटिएको प्रहरीले जनाएको छ । पक्राउ परेकी राना र कुमाललाई ज्यान सम्बन्धी कसुरमा मुद्धा दर्ता गरि अनुसन्धान गरिएको प्रहरी नायब उपरिक्षक रविन्द्र खनालले जानकारी दिनुभयो ।