मणी प्रसाद अर्याल
वालिङ,२० साउन– वालिङ नगरपालिकाका नगर प्रमुख कृष्ण खाँण नागरिकको घर दैलोमा पुगेर सामाजिक सुरक्षा भत्ता वितरण गर्नुभएको छ ।

शुक्रबार वालिङ नगरपालिकाका १४ को विभिन्न टोल तथा घर–घरमा पुगेर नगरप्रमुख खाँणले सामाजिक सुरक्षा भत्ता वितरण गर्नुभएको हो । सामाजिक सुरक्षा भत्ता वितरण गर्दै नगरप्रमुख खाँणले बैंकमा पुगेर जेष्ठ नानरिकहरुलाई भत्ता लिन समस्या हुने भएकोले घरदैलोमा नै आएर भत्ता वितरण गरेको बताउनुभयो ।

पछिल्लो समयमा कोभिड १९ को संक्रमण पनि बढिरहेको हुँदा संक्रमणको जोखिम न्युनिकरणको लागि पनि घर दैलोमै आएर भत्ता वितरण गरिएको नगरप्रमुख खाँणको भनाइ थियो । नगरप्रमुख खाँणले नगरबासीहरुको समस्यामा नगर सदैव साथमा रहेको बताउँदै नगरपालिका नागरिकको दैनिकीको सहयात्री बन्ने स्पष्ट पार्नुभयो ।

भत्ता वितरण कार्यक्रममा नगरउपप्रमुख कविता तिवारी लगायतका जनप्रतिनिधिहरुको सहभागिता रहेको थियो । मेघा बैंक वालिङको समन्वयमा १ सय ५१ जना सेवाग्राहिहरुलाई सामाजिक सुुरक्षा भत्ता वितरण गरिएको नगरपालिकाले जनाएको छ ।