गोपाल जिटी
वालिङ,१ साउन– असार महिना सकिदासम्म स्याङ्जामा ८१ प्रतिशत रोपाइँ सकिएको छ । धान खेती हुने कुल भू–भागमध्ये ८१ प्रतिशतमा रोपाइँ सकिएको कृषि ज्ञान केन्द्रका प्रमुख विनोद हमालले जानकारी दिनुभयो । ट्र्याक्टर लगायत आधुनिक प्रविधिको प्रयोग गरिन थाले पनि कतिपय स्थानमा पुरानै शैलिमा गोरुले जोतेर रोपाइँ गर्ने प्रचलन कायमै छ । बाँझो खेतमा असारको सुरुदेखि रोपाइँ हुने गर्दछ भने मकैखेतमा साउनको पहिलोसाता सम्म रोपिन्छ । अधिकांश किसानहरुले भने यसवर्षको धान रोपाइँको मैझारो गरिसकेका छन् ।

स्याङ्जाका किसानहरु अहिले आएर उन्नत जातको धानमा आकर्षित भएका छन् । खान मिठो र हाईब्रिट जत्तिकै उत्पादन हुनेभएपछि किसानहरु उन्नत जातको धानमा आकर्षित भएका हुन् । केन्द्रका प्रमुख हमालका अनुसार जिल्लामा हाईब्रिट र स्थानीय जातका तुलनामा धेरैले उन्नत जातका धान लगाएका छन् । हाईब्रिट धानमा कालो पोके किराले आक्रमण गर्ने तथा प्राकृतिक प्रकोपले छिट्टै असर गर्ने भएकाले पनि कृषकहरु उन्नत जातका धानमा आकर्षित भएका केन्द्रका प्रमुख हमालको भनाई छ ।

किसानहरुले विशेषगरी साबित्री, राधा ४, सुनौलो सुगन्धा, खुमल ११, मकवानपुर १, स्थानीय मन्सुली, राधा ७, राधा ११ र १२ लगायतका उन्नत जातका धान लगाउने गरेका छन् । यसैगरी, बर्मेली, जर्नेली, अनदी, गुर्दी, पहेंले, खुमल, गोला लगायतका स्थानीय धान पनि रोपिन्छन् । धान बाली मुख्य खाद्यान्न बाली हो । जिल्लाको आँधीखोलाका किनार, फेँदिखोला, पुतलीबजार, वालिङ, भीरकोटलगायत भेगका धेरै स्थानमा रोपाइँअन्तिम चरणमा पुगेको छ । गल्याङका तल्लो भेग, चापाकोट, ज्याग्दी फाँट, कालीगण्डकीका केहि भेगमा भने रोपाइँ भईरहेको छ । जिल्लामा धान खेति हुने कूल भु—भाग १६ हजार ८ सय ३० हेक्टर छ । यसमध्ये १३ हजार ६ सय ३२ हेक्टरमा रोपाइँ सकिएको ज्ञानकेन्द्रले जनाएको छ ।