वालिङ,२ जेठ– कालीगण्डकी गाउँपालिकामा एमालेको तर्फबाट उम्मेदवार बन्नुभएका खिमबहादुर थापा गाउँपालिका अध्यक्षमा र सावित्रा कोइराला उपाध्यक्षमा विजयी हुनुभएको छ ।
थापाले नेपाली कांग्रेसको तर्फबाट उम्मेदवार बन्नुभएकी माया रानालाई १ हजार ६ सय ४५ मतको अन्तरले पछि पार्दै थापाले ६ हजार ७ सय मत प्राप्त गर्नुभएको छ भने प्रतिद्वन्दी माया रानाले ५ हजार ५५ मत ल्याएर पराजित हुनुभएको छ ।
त्यसै गरी गाउँपालिकाको उपाध्यक्षमा नेकपा एमालेकै सावित्रा कोइराला विजयी हुनुभएको छ । कोइरालाले गठबन्धनका बोम बहादुर लामिछानेलाई १३ सय ९३ मतको फराकिलो मतान्तरले पछाडि पार्दै विजयी हुनुभएको छ ।
उपाध्यक्ष उम्मेदवार कोइरालाले ६ हजार २ सय २३ मत प्राप्त गर्नुभएको छ भने गठबन्धनका उम्मेदवार लामिछानेले ४ हजार ८ सय ३० मत प्राप्त गर्नुभएको छ ।
कालीगण्डकी गाउँपालिकामा एमालेले वडा नम्बर १,३ र ६ गरि तीन ओटा वडामा विजयी हासिल गरेको छ भने गठबन्धनले २,४,५ र ७ गरी चार ओटा वडामा विजयी हासिल गरेको छ । १७ हजार ९ सय ३८ मतदाता रहेकोमा १२ हजार २ सय ७१ मतदाताले मतदान गरेका थिए । गाउँपालिका अध्यक्ष थापा र उपाध्यक्ष कोइराला पुन सोही पदमा दोहोरिनुभएको हो ।