वालिङ,२५ वैशाख– नेपाली कांगे्रसका उपसभापति धनराज गुरुङले नेता सुध्रिन आवश्यक रहेको बताउनुभएको छ । स्याङ्जाको अर्जुनचौपारी गाउँपालिकामा आयोजित चुनावी सभालाई सम्बोधन गर्दै उपसभापति गुरुङले भन्नुभयो, ‘नेपालको अवस्था परिर्वतन गर्न हामी नेता सुध्रिन आवश्यक छ । नेताहरुले भ्रष्टाचार नगर्ने हो भने देश आर्थिक रुपमा शसक्त बन्न सक्छ । ७० वर्ष पहिला हाम्रो नेपाल जस्तै गरिव राष्ट्रहरु अहिले विकसित मुलुकमा परिणत भएको छ । हामी जहाँको त्यहीँ छौँ ।’

उपसभापति गुरुङले फरक झण्डा र फरक पार्टी हुँदैमा फरक विचार नहुँने भन्दै गठबन्धनको बचाउ गर्नुभयो । उपसभापति गुरुङले भन्नुभयो, ‘फरक झण्डा बोक्दैमा फरक पार्टी हुँदैमा फरक विचार हुँदैन । सत्रु त हाम्रो गरिबी हो, भ्रष्टाचार हो । गरिबी भ्रष्टाचारलाई हटाउँदै देशमा सुशासन कायम गर्न अहिलेको गठबन्धन बनेको हो ।’ देशमा व्यवस्था परिर्वतन भएपनि अवस्था परिर्वतन हुँन नसक्दा नेपाल जहाँको त्यहीँ रहेको भन्दै अवको यात्रा समृद्धिको रहेको बताउनुभयो ।

पानीबाटै समृद्धि प्राप्त गर्न सकिने भन्दै नेता गुरुङले ५० हजार मेगावार्ट विजुली उत्पादन गर्न सकियो भने नेपाल समृद्ध हुने बताउनुभयो । त्यस्तै यहाँका कृषिमा आधुनिकिरण, पर्यटकीय क्षेत्रको विकास गरी नागरिकको जिवनस्तर माथि उकास्न सकिएमा गरिबीलाई हटाउन सकिने बताउनुभयो । अहिलेको निर्वाचनमा निकै सचेत भएर मतदान गर्नुपर्ने भन्दै क्षणभरको खुसी र सुख भन्दा दिर्घकालीन खुसी र सुख खोज्ने समय भएको नेता गुरुङको भनाइ थियो ।

कार्यक्रममा केन्द्रिय सदस्य सरस्वति अर्यालतिवारी, गण्डकी प्रदेश उपसभापति कल्पना तिवारी, जिल्ला सभापति राजु थापा, गठबन्धनका नेता शैलेन्द्र घिमिरे, गाउँपालिका अध्यक्षका उम्मेदवार प्रकाश तिवारी, उपाध्यक्षका उम्मेदवार सपना गुरुङलगायतले बोल्नलुभएको थियो ।