वालिङ,४ वैशाख– वालिङ नगरपालिका १२ डाडाखर्कमा आइतबार बिहान जिप दुर्घटनामा परि घाइते भएका ६ जनाको पोखरामा उपचार भइरहेको छ ।
डाडाखर्कबाट झलुङ्गे बजार तर्फ आउदै गरेको ग १ ज ७३९९ नम्बरको जिप दुर्घटना हुँदा ५ जनाको मृत्यु भएको छ भने गम्भीर घाईते भएका ६ जनाको पोखरा स्थित गण्डकी मेडिकल कलेज पोखरामा उपचार भइरहेको छ ।
घटना स्थलमै ४ जनाको मृत्यु भएको र उपचरको लागि अस्ताल ल्याउदै गर्दा एक बालकको बाटोमै ज्यान गएको प्रहरीले जनाएको छ । मृत्यु हुनेहरूमा ६५ वर्षका वीर बहादुर डाला, ४५ वर्षका हिरा डाला, २५ वर्षीया शर्मिला सारू, उहाँको सात महिने छोरा, ६१ वर्षीया कुल कुमारी कनौजेको मृत्यु भएको जिल्ला प्रहरी कार्यालय स्याङ्जाका प्रहरी निरीक्षक पदमराज थापाले जानकारी दिनुभयो ।
घाइते हुनेहरूमा वालिङल १२ डाडाखर्कका अन्दाजी ६० वर्षका अंग बहादुर डाला, ५५ वर्षीया माया कुमारी शारु, ३५ वर्षीय योगेन्द्र थापा, १८ वर्षीय नबिना शारु, १९ वर्षीय लक्ष्मी डाला र ६० वर्षीय दल बहादुर थापा रहेको प्रहरीले जनाएको छ ।
जिप अनियन्त्रित भई सडकबाट २०० मिटर तल खसेको प्रहरी निरीक्षक पदमराज थापाले जानकारी दिनुभयो । घटना बारे अनुसन्धान भइरहेको प्रहरीले जनाएको छ । गाउँमै भएको दुःखद घटनाले यतीबेला गाउँ शोकमा डुबेको छ ।